Економија

ГОЛТКА ВОДА, ГОЛТКА СОК ‒ МАКЕДОНЦИТЕ ИСПИЛЕ 204 МИЛИОНИ ЕВРА

Граѓаните се придржуваат до советите за редовно внесување течности. Само минатата година испиле вода и сокови за 204,2 милиони евра. И освен за сопственото здравје, придонеле во растот на една од најразвиените дејности кај нас ‒ производство на безалкохолни пијалаци. Всушност, им дале дополнителен поттик на десетте најголеми компании – системите со мултинационална поддршка и локалните производители, кои на пазарот се натпреваруваат со квалитет и иновациии.

Не пресметавме на колку консумирани литри соодветствува вкупниот испиен износ, но анализата што ја направи Пари во соработка со Бизнис Мрежа, покажува дека домашниот пазар е доволно голем за секој од производителите да најде и да дојде до своите потрошувачи. Како и со што ја стекнуваат и надградуваат нивната доверба, тоа е во доменот на деловните политики, кои, според бројките, се потврдуваат како мошне успешни.

СЕКОЈ ПРОИЗВОДИТЕЛ ИМА МИЛИОНСКИ ПРОМЕТ

Приходите на компаниите што произведуваат безалкохолни пијалаци почнуваат од над два милиони и го надминуваат износот од 138 милиони евра. Сепак, убедлива е предноста на Пивара Скопје, која зафаќа дури 67,8 насто од вкупниот промет на десетте компании. Се опишуваат како одржлива продажноориентирана компанија којашто живее и дише за потребите на купувачите и консументите, а вековната традиција оди во прилог на тоа. Лани е остварен приход од 138,4 милиони евра. Силната бренд-позиција, технологијата и широкиот асортиман производи ѝ овозможува да ги одржува доминацијата на домашниот терен и значителното присуство во Регионот.

Во подножјето на Кожуф се роди визија… Семејството Јанчеви три децении го шири бизнисот, а Кожувчанка лани направи обрт од 18 милиони евра, резултат од континуирани инвестиции во производствените линии и успешното брендирање.

Речиси на исто приходно рамниште се Горска (9,3 милиони) и Соко Горица (9,2 милиони), кои со освежувачките и природни производи ја зајакнуваат конкуренцијата во категоријата на минерални води и сокови. Првата го користи изворот Трнскот на Кожуф, а втората е ориентирана кон изработката на овошни пијалаци за здрав начин на живеење.

Компаниите Магрони за производство и дистрибуција на природна минерална, изворска вода и сокови, како и Пелистерка со водата од изворите во Меџитлија и другите пијалаци, се исто така значајни фактори во оваа област. Нивните приходи се 8,2 милиони, односно 6,8 милиони евра.

Целата анализа на pari.com.mk

Економија

Вкупен неделен промет над 68 милиони денари, без позначајни активности на обврзничкиот пазар

Изготвен од Илирика Инвестментс АД Скопје врз основа на официјални податоци од Македонска берза.

Во периодот од 15 до 19 декември 2025 година, на Македонската берза беа реализирани 328 трансакции со вкупна вредност од 68,18 милиони денари и 15.278 тргувани хартии од вредност . Индексот МБИ10 неделата ја заврши со пад од 0,41%, на ниво од 10.091,11 поени, додека индексот ОМБ остана стабилен на 129,44 поени, без позначајни промени.

Најтргувани хартии од вредност

● Комерцијална банка АД Скопје (KMB) – 30.446.550 денари

● Алкалоид АД Скопје (ALK) – 14.924.156 денари

● Макпетрол АД Скопје (MPT) – 5.861.013 денари

Блок-зделки

Во текот на неделата беа реализирани четири големи блок-зделки, во вкупна вредност од 245,47 милиони денари, меѓу кои:

● Комерцијална банка АД Скопје (KMB) – 65,41 милиони денари

● Гранит АД Скопје (GRN) – 2,12 милиони денари

● Македонијатурист АД Скопје (MTUR) – 115,23 милиони денари

Топ добитници

● Реплек АД Скопје (RPK) +0,93%

● Макстил АД Скопје (MST) +2,34%

● ВВ Тиквеш АД Кавадарци (VVK) +0,03%

Топ губитници

● Гранит АД Скопје (GRN) –2,82%

● Комерцијална банка АД Скопје (KMB) –1,15%

● Алкалоид АД Скопје (ALK) –0,52%

Обврзнички пазар

Во текот на неделата беа реализирани три трансакции со државни обврзници од сериите „Денационализација 16“, „Денационализација 19“ и „Денационализација 23“, со вкупна вредност од 97.841 денар. Индексот ОМБ остана непроменет, со стабилни цени на обврзниците во опсег од 90 до 93,7 евра по обврзница.

Неделата од 15 до 19 декември 2025 година се карактеризираше со значителен обем на промет, главно поттикнат од големите блок-зделки со акциите на Комерцијална банка, Македонијатурист и Карпош. Индексот МБИ10 бележи пад од 0,41%, под влијание на корекциите кај Гранит и Комерцијална банка, додека Реплек и Макстил беа меѓу ретките добитници.

Обврзничкиот пазар остана со ограничена активност и стабилни приноси, одржувајќи ја генералната пазарна стабилност во последната целосна недела пред празничниот период.

Економија

Најбарани професии во ЕУ – продажба, маркетинг и производство

Според податоците на Евростат за минатата година, најголема незадоволена побарувачка за работна сила во Европската унија имало во професиите поврзани со продажба, маркетинг и производство. Ова укажува на можни тешкотии за работодавачите при регрутирање на персонал во овие сектори.

Според експерименталната статистика, составена делумно преку податоци од онлајн огласи за работа, највисоки стапки на слободни работни места биле забележани кај работници во производство и помошни канцелариски работници, со стапка од 7,3% секое. Следуваат други работници во продажба со 6,1% и уметнички, културни и кулинарски соработници со 6%.

Дополнително, околу 5,8% од непополнетите позиции се однесувале на работници во транспорт и магацини, 5,7% на менаџери за малопродажба и големопродажба, 5,4% на агенти за бизнис и услуги, 5,2% на оператори на постројки и машини и 5% на инженерски професионалци, со исклучок на електротехничките профили.

Евростат истакнува дека иако здравствените работници и наставниците, како и други занимања во јавниот сектор, исто така може да се соочат со тешкотии при регрутирање, тие поретко се рекламираат онлајн, па затоа во податоците се рангирани пониско. Од друга страна, ИТ професиите може да бидат претставени со поголема застапеност во онлајн огласите за работа.

Економија

Хрватска ги менува правилата за странски работници – еве колку дозволи има за Македонците

Хрватска воведува нови услови за вработување на странски државјани со цел подобра контрола, намалување на нелојалната конкуренција и спречување на нелегалните практики. Измените на Законот за странци воведуваат построги здравствени критериуми и барање за познавање на хрватскиот јазик, информира ХРТ.

Граѓанин на трета земја, како Македонија, за прва дозвола за привремен престој ќе мора да приложи потврда за здравствена состојба и статус на вакцинација, кои не смеат да бидат постари од 90 дена. Исто така, познавањето на хрватскиот јазик се смета за основа за интеграција на странските работници, а државниот секретар Иван Видиш посочи дека и покрај кофинансираното учење јазици од Европскиот социјален фонд, интересот кај работниците е слаб.

Хрватска годинава издаде над 11.000 работни дозволи за граѓани од Македонија. Премиерот Андреј Пленковиќ истакна дека во последните две години се создадени 100.000 нови работни места, а бројот на невработени паднал на 81.000, што го покажува ефектот од активната политика за вработување.

Министерот за труд Марин Пилетиќ додаде дека во земјата моментално има околу 140.000 странски работници, а измените на законот ќе го намалат бројот на нови дозволи, додека ќе се зголеми значењето на оние кои веќе се наоѓаат во Хрватска.

Претседателот на GSV, Иван Мишетиќ, посочи дека во наредните пет години ќе бидат потребни над 100.000 работници од странство поради планираниот раст и пензионирањата, бидејќи домашниот пазар не може да го задоволи овој раст.