Судењето за катастрофалниот пожар во кочанската дискотека „Пулс“, во кој на 16 март загинаа 63 лица, меѓу кои и шест малолетници, а повеќе од 200 беа повредени, ќе започне на 19 ноември во судницата на затворот „Идризово“, соопшти Основниот кривичен суд Скопје.
Според соопштението, обвинителниот акт што првично го поднесе Основното јавно обвинителство Кочани, а потоа беше префрлен во надлежност на Јавното обвинителство Скопје, е целосно одобрен и распределен кај судијката Диана Груевска Илиевска.
Од Судот наведуваат дека, поради лично познанство со дел од оштетените, судијките Тамара Витларова–Смилевска и Илина Смичковска–Илиевска се изземаа од постапувањето по предметот. Како втор член на судечкиот совет е назначен судијата Ахмед Идризи.
За да се обезбеди ефикасно и економично судење, веќе се закажани неколку термини за главна расправа — 25 и 26 ноември, како и 2, 4, 10 и 11 декември 2025 година. По почетокот на процесот, ќе бидат усогласени и дополнителни рочишта. Судот потврди дека поканите до сите странки се во фаза на достава.
На обвинителна клупа ќе седнат 37 лица, меѓу кои се сопствениците на дискотеката, членови на нивните семејства, архитект, поранешни градоначалници, инспектори, обезбедувачи и државни функционери.
Според обвинението, со години се толерирале и прикривале сериозни прекршувања на законите, а на дискотеката ѝ било дозволено да работи и покрај тоа што не ги исполнувала ни основните стандарди за безбедност, што резултирало со една од најтешките трагедии во поновата историја на Македонија.
