На средбата на американскиот претседател Доналд Трамп и украинскиот лидер Володимир Зеленски во Белата куќа, вниманието на јавноста го привлече необичен моден детал.
Американскиот министер за одбрана Пит Хегсет се појави со вратоврска во боите на руската тробојка – бела, сина и црвена, подредени исто како на руското знаме.
Според снимките емитувани на американските телевизии, Хегсет седеше од левата страна на Трамп, а меѓу нив беше државниот секретар и советник за национална безбедност Марко Рубио. Од десната страна беа потпретседателот Џ. Д. Ванс и министерот за финансии Скот Бесент.
Иако американското знаме исто така ги содржи овие бои, редоследот и дизајнот на Хегсетова вратоврска беа необични и се издвојуваа меѓу едноставните комбинации на останатите членови на делегацијата.
Трамп и неговите соработници носеа еднобојни, едноставни вратоврски, додека изборот на Хегсет привлече големо внимание и коментари. Некои коментатори претпоставуваа дека тоа може да е суптилна порака или провокација упатена кон украинската страна, додека други сметаат дека станува збор само за случаен моден избор без политичко значење.
