Комунистичката партија на Кина ја спроведе една од најобемните воени чистки во последните неколку децении, исфрлајќи девет високи генерали од армијата и од самата Партија поради сериозни случаи на корупција и злоупотреба на службена должност, јави Би-Би-Си.
Меѓу сменетите се наоѓаат Хе Вејдонг, потпретседател на Централната воена комисија и втор највисок офицер во државата, Мјао Хуа, директор на Одделот за политичка работа, како и неколку команданти на копнените, морнаричките, ракетните и полициските сили. Хе Вејдонг е првиот активен член на Политбирото што е под истрага.
Министерството за одбрана соопшти дека офицерите „сериозно ја прекршиле партиската дисциплина и сториле кривични дела поврзани со огромни финансиски средства“. Сите ќе се соочат со воено обвинителство.
Аналитичарите оценуваат дека чистката не е само дел од антикорупциската кампања, туку и политички потег на Си Џинпинг за зацврстување на контролата врз армијата пред претстојниот пленум на Партијата на 20 октомври, каде ќе се расправа за идниот економски и кадровски курс на земјата.
Според експертот Нил Томас, Си ја гледа оваа „самореволуција“ како начин за прочистување на системот, но ваквите акции, додава тој, го прават поригиден и помалку иницијативен.
