Право на глас на осмите локални избори во Македонија, што ќе се одржат во недела, имаат 1.832.415 гласачи, од кои 1.717.803 се во земјата, а 112.000 се запишани во посебниот избирачки список на лица во странство. Покрај нив, во избирачкиот список се евидентирани 2.162 гласачи во затвори и притвор и 450 гласачи во старски домови.
Иако годинава нема гласање во дијаспората, сите граѓани кои живеат или престојуваат во странство ќе можат да го остварат своето избирачко право доколку допатуваат во Македонија.
Најголем број гласачи има Градот Скопје – вкупно 474.304, а меѓу општините Куманово е прво со 94.041 гласач, потоа следуваат Тетово (87.878), Гостивар (82.893), Битола (77.253), Аеродром (68.772), Струга (62.711) и Прилеп (62.053).
Најмалку гласачи има во Лозово – 1.905, потоа во Вевчани (2.092), Новаци (2.429), Конче (2.716) и Ранковце (2.921).
Гласањето ќе се спроведе на 3.474 избирачки места, шест помалку од предвидените со Изборниот законик, бидејќи во тие места нема жители. Според податоците од Државната изборна комисија, 125 избирачки места имаат помалку од 10 гласачи, а најголемото избирачко место е во Бутел, со 1.432 гласачи.
Интересен податок е дека најстариот гласач е роден во 1918 година, а најмладиот ќе полни 18 години токму на денот на изборите, 19 октомври. Вкупно 25.603 лица со наполнети 18 години првпат ќе гласаат.
Овие локални избори се осми по ред од независноста на државата, а четврти на кои се избираат и градоначалници и советнички листи во 80 општини и Градот Скопје. Ќе се гласа за 309 кандидати за градоначалници и 576 листи за општински совети, со вкупно 10.490 кандидати.
На изборите учествуваат 22 партии, 19 коалиции и 119 групи на избирачи, односно независни кандидатури.
Најголема конкуренција има во Градот Скопје, каде што во трката за градоначалник влегуваат 16 кандидати.
