Минатата недела, американскиот долар ослабе во однос на повеќето светски валути, додека еврото зајакна, под влијание на трговската тензија меѓу САД и Кина и очекувањата за понатамошно намалување на каматните стапки од Федералните резерви.
Индексот на доларот, кој ја мери вредноста на американската валута во однос на шесте главни светски валути, забележа пад од 0,3 проценти, достигнувајќи 98,54 поени. Во однос на еврото, доларот ослабе за 0,3 проценти, што го зголеми курсот на еврото на 1,1655 долари. Американската валута забележа пад и во однос на јапонскиот јен, па цената на доларот се намали на 150,60 јени.
Притисокот врз доларот се зголеми откако претседателот Доналд Трамп најави воведување на 100-процентни царини за Кина од 1 ноември, што следеше по ограничувањата на кинескиот извоз на ретки минерали. Кина најави контрамерки, додека Трамп во последните денови ја ублажи својата реторика.
Дополнителен фактор за слабеењето на доларот беа знаците за проблеми во регионалните банки во САД. Во меѓувреме, се очекува дека ФЕД, по септемвриското намалување на каматните стапки, ќе ги намали каматите уште двапати до крајот на годината, поради релативно слабиот американски пазар на трудот. Ова го намалува растојанието помеѓу каматните стапки во САД и еврозоната, бидејќи Европската централна банка во последната година ги намали каматните стапки поостро.
Еврото исто така доби поддршка од стабилизацијата на политичката сцена во Франција, по делумното ублажување на кризата предизвикана од неочекуваната оставка на француската влада.
