Нигерија, најнаселената земја во Африка, е едно од најдолготрајните жаришта на насилство во светот. Последните години се бележат масовни напади врз христијанските заедници, во кои според процените загинале десетици илјади луѓе.
Американскиот комичар и политички коментатор Бил Махер изјави дека „во Нигерија се убиени над 100.000 христијани и уништени 18.000 цркви“, нарекувајќи го тоа „поголем обид за геноцид отколку во Газа“. Иако бројките не се потврдени од ОН, организациите Intersociety и Genocide Watch предупредуваат дека во земјата се случува масакр со карактеристики на геноцид.
Според ОН, најмалку 62.000 христијани се убиени од 2000 година, а стотици илјади се раселени. Насилството најчесто се случува во централниот дел на земјата, каде се судираат муслимански сточари Фулани и христијански земјоделци, иако властите тврдат дека конфликтот има повеќе економски отколку верски причини.
Бруталните напади станаа почести по подемот на џихадистичката група Боко Харам во 2009 година, која бара воведување шеријатски закон во целата држава. Нејзината фракција, ИСВАП (Исламска држава – Западноафриканска провинција), во последните години често ги таргетира христијанските заедници.
Во јуни годинава, во напад во државата Бенуе беа убиени најмалку 100 луѓе, а повеќе од 500.000 беа раселени. Амнести интернешнал и други организации ја обвинија владата за неказнивост и предупредија дека „властите мора да ја прекинат културата на неказнување што создава чувство на целосна несигурност“.
И покрај зголемените меѓународни притисоци, насилството во Нигерија не запира — а многумина предупредуваат дека земјата се соочува со една од најголемите хуманитарни трагедии во модерната Африка.
