Претседателот Володимир Зеленски и неговиот тим со месеци работеле да го добијат Доналд Трамп на страната на Украина, пишува The Kyiv Independent. Неколку дена пред средбата во Вашингтон, двајцата лидери имале два телефонски разговора, а Трамп дури најави можен трансфер на ракети „томахавк“ кон Украина.
Но, токму тогаш му се јавил Владимир Путин. Телефонскиот разговор меѓу Трамп и Путин, според извори запознаени со ситуацијата, го нарушил текот на средбата и очекувањата од неа.
„Путин го повикал Трамп поради ‘томахавките’“, рекол Зеленски на затворен состанок со новинари, додавајќи дека Трамп не сака ескалација со Русија пред лична средба со Путин.
Во меѓувреме, Трамп најави нов самит со Путин во Будимпешта, што Зеленски го оцени како „нова шанса за Путин“, но сепак останал отворен за учество ако биде поканет.
Путин, наводно, повторно побарал Украина да ја предаде Доњецката област, а во замена би можел да се повлече од делови на Запорожје и Херсон. Зеленски предупредил дека тоа би му овозможило на Путин да ја прикаже ситуацијата како „победа во војната“.
Иако односите меѓу Киев и Вашингтон се подобрени по конфликтот во февруари, Трамповата благонаклонетост кон Москва и натаму загрижува. „Путин не сака да зборува со Украина без големи отстапки“, велат извори блиски до Зеленски.
Украинскиот претседател нагласил дека нема да ја „продаде Украина“, истакнувајќи дека Путин сака целосна окупација и користи тактики на неизвесност за да спречи нови санкции.
Извор близок до Зеленски додава: „Трамп сака војната да заврши – но му изгледа поевтино тоа да се случи на сметка на Украина.“
