Американскиот претседател Доналд Трамп и рускиот лидер Владимир Путин договорија состанок во Будимпешта, што предизвика бројни реакции. Унгарскиот премиер Виктор Орбан го поздрави потегот и ја нарече Унгарија „остров на мирот“, ветувајќи му на Путин целосна заштита и безбедност при доаѓањето.
Според аналитичарите, Путин ќе пристигне преку јужната рута — преку Турција, Грција, Црна Гора и Србија — за да избегне непријателски територии. Истовремено, поранешниот полковник на руската тајна служба, Андреј Безруков, го предупреди Путин да не патува, тврдејќи дека „Будимпешта може да биде британска замка“.
Безруков оцени дека британската елита го гледа Путин како најголема закана и дека „би ризикувале сè за да го елиминираат“, но не понуди докази за своите тврдења. Лондон ги нарече изјавите апсурдни, а аналитичарите сметаат дека се работи за класична руска дезинформација.
На средбата во Будимпешта се очекува да се разговара за можен прекин на огнот во Украина. Украинскиот претседател Володимир Зеленски изрази загриженост и го предупреди Трамп да не прифаќа услови што би биле на штета на Киев.
Унгарскиот министер за надворешни работи Петер Сијарто потврди дека Путин ќе биде примeн „со почит и целосна безбедност“. Орбан гледа во овој состанок можност Унгарија да се претстави како неутрален посредник меѓу светските сили, иако потегот наиде на остри критики во Брисел и НАТО.
