Скопје

Ѓорѓиевски: Во првите 72 часа генералка во Скопје, сметот и мини депониите ќе бидат минато

Орце Ѓорѓиевски, кандидат за градоначалник на Град Скопје од ВМРО-ДПМНЕ, најави дека во првите 72 часа од мандатот ќе спроведе целосна генералка во градот, со цел решавање на проблемот со сметот и мини депониите. Тој гостуваше во „Тема на денот“ на ТВ Сител, каде ги претстави и приоритетните проекти за инфраструктура и сообраќај.

„Проблемот со сметот не е нов, се соочуваме со хронична ситуација веќе неколку години. Во многу микро локации има недостиг на контејнери, а дел од нив се намалени од 3-4 на само 1. Ќе треба да утврдиме дали некој свесно го направил тоа“, истакна Ѓорѓиевски.

Тој додаде дека градоначалниците ќе дејствуваат брзо, со помош на општествено одговорни компании и соседни општини каде е потребно. Ѓорѓиевски јасно го означи менаџментот на Град Скопје како одговорен за сегашната состојба, наведувајќи го името на градоначалничката Данела Арсовска.

„Стојам позади секое мое ветување. На Градот Скопје му треба генералка, главната организација треба да ја води Комунална хигиена, која ги има сите ресурси за кои граѓаните плаќаат“, рече Ѓорѓиевски.

Тој ги истакна и приоритетните инфраструктурни проекти, вклучувајќи ја изградбата на првата подземна сообраќајница во Македонија – „Лимак“, како и завршување на четири клучни проекти: Љубљанска, мостот Михајло Апостолски, булеварот Борис Трајковски и клучката кај Момин Поток.

Ѓорѓиевски најави дека ќе бара поддршка од сите скопјани и дека веќе добил потврда за поддршка од организацијата ВРЕДИ И ЗНАМ.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.