Атинската политичка сцена повторно ја тресат познати лица. Поранешните премиери Алексис Ципрас и Андонис Самарас подготвуваат политички камбек што би можел длабоко да ја промени рамнотежата во Грција.
Левичарот Ципрас, кој ја водеше земјата во најтешките години од должничката криза (2015–2019), објави дека ја напушта Сириза и дека ќе формира нова партија. Според него, опозициската сцена е ослабена и фрагментирана, а потребна е „реорганизација на прогресивната опозиција“ под ново раководство. Според анкетите, неговата нова платформа би можела да освои и до 20 проценти од поддршката.
Истовремено, од десното политичко крило се најавува друга офанзива. Поранешниот конзервативен премиер Андонис Самарас, исклучен од „Нова демократија“ во 2024 година, ги засили критиките кон актуелниот премиер Киријакос Мицотакис. Самарас остро се спротивставува на приближувањето со Турција и на политиките на смирување во регионот, што ги нарекува „национални отстапки“. Медиумите во Атина шпекулираат дека подготвува создавање на „патриотска“ десна партија.
Аналитичарите предупредуваат дека ваквиот двоен политички камбек може да создаде силен притисок врз владата на Мицотакис – и од левицата и од десницата. „Во моментот постои голем вакуум во политичкиот систем. Недостасуваат нови лица, а старата гарда повторно се враќа со стари идеи“, вели политикологот Левтерис Кусулис.
Ципрас, пак, во пресрет на објавувањето на својата автобиографија во ноември, повторно е во центарот на вниманието. Тој најавува дека ќе „зборува директно со граѓаните“, исто како во 2015 година, кога организираше референдум против мерките за штедење.
Грција, изгледа, повторно влегува во период на турбулентни политички промени – каде што старите играчи се враќаат со нови амбиции, а иднината на владејачките конзервативци станува сè понеизвесна.
