Република

Тоневски ветува развој, нови автобуски линии и подобри услови за учениците

ВМРО-ДПМНЕ и кандидатот за градоначалник на Пробиштип, Тони Тоневски, соопштија дека ќе продолжат и унапредат сите постојни мерки и програми кои се во интерес на граѓаните. Во партиското соопштение се нагласува дека, за разлика од досегашното управување, новата локална власт ќе воведе поефикасни и попродуктивни решенија за подобар живот во општината.

„Како што секоја власт досега ги продолжувала корисните и прифатените мерки и проекти, така ќе биде и сега. Но со една разлика – со ВМРО-ДПМНЕ и Тони Тоневски, овие програми ќе станат подобри,“ се наведува во соопштението.

Меѓу најавените проекти се издвојуваат воведување нови автобуски линии за жителите на Барбаревско Маало, Калниште, Камењар и другите периферни делови, како и можност за редовен превоз до Злетово. Партијата најавува и подобрени оброци за учениците со поголема нутритивна вредност, како и континуитет на сите мерки за поддршка на младите семејства, првачињата и социјално ранливите категории.

„Не дозволувајте лагите и стравот да ве заведат. Нема да се кратат мерки – ќе се зголемува поддршката! Нема да се укинуваат програми – ќе се создаваат нови можности!“, порачаа од ВМРО-ДПМНЕ.

Целта на програмата, како што беше посочено, е Пробиштип да стане општина на развој, со повисоки плати, нови работни места, урбан напредок и реални инвестиции.

„Работата на градоначалникот е да биде во служба на сите граѓани. Токму таков ќе биде Тони Тоневски – градоначалник што слуша, разбира и работи за секој еден од вас,“ стои во завршниот дел од соопштението.

Република

„Шпанец“ се враќа на пругите: Модернизиран и подготвен за патници

Легендарниот воз „Шпанец“, некогаш заборавен и речиси отпишан, се враќа на пругите со целосно нов лик. Денес беше тестирана обновената верзија на возот, кој сега располага со модерен дизајн, телевизори, озвучување, алармни системи и видео надзор.

Одговорните најавуваат дека подготовките за поудобно и побезбедно патување се во полн ек, со цел патниците да уживаат во современо и безбедно патување.

Следуваат уште новости за враќањето на овој легендарен воз – останете со нас за сите детали.

Видеото може да го погледнете тука

Република

После многу години конечно Тетово ќе се украсува

На онлајн седница одржана денеска, 12 декември 2025 година, Советот на Општина Тетово со мнозинство гласови донесе одлука за украсување на градот за претстојните новогодишни празници.

„За оваа програма „за“ гласаше советничкото мнозинство составено од Коалицијата „Вреди“ и ВМРО-ДПМНЕ, додека против беа советниците од коалицијата НАИ. Воздржани беа од Подобро за Тетово, Левица и СДСМ. Со оваа одлука, Општина Тетово ја потврдува намерата градот да добие празничен сјај за крајот на 2025 година“, изјави претседателот на Советот, Јусуф Абдули.

Истовремено, изгласана е измена на Програмата за активности на Општина Тетово во областа на културата за 2025 година. Според новата програма, за празничното украсување се предвидени еден милион и петстотини илјади денари, што е над 24 илјади евра.

Република

Коњановски ги прими просветните работници на годината од Битола

Градоначалникот на Битола, Тони Коњановски, денеска оствари средба со добитничките на признанието „Просветен работник на годината“ за учебната 2024/2025 година – Наташа Тодоровска, наставник по одделенска настава во ОУ „Ѓорѓи Сугарев“, и Аница Б. Златевска, психолог во ОУ „Коле Канински“.

Коњановски им честиташе за значајното признание доделено од Министерството за образование и наука и Сојузот на просветни работници, нагласувајќи дека ваквите награди се симбол на поширока општествена заложба за почит и вреднување на улогата на наставниците, воспитувачите и стручните соработници во образованието.

Тој истакна дека трудот на просветните работници е фундаментален за формирањето на идните генерации и дека локалната самоуправа ќе продолжи да ја поддржува нивната работа.

Признанијата се доделуваат во рамките на кампањата „Магијата е во знаењето“, која Министерството ја реализира по повод 5 Октомври – Светскиот ден на учителите, со цел истакнување на незаменливата улога на учителите и зголемување на општествената почит кон нив.