На денешниот Самит на Европската унија во Брисел, Европскиот совет ја потврди својата решеност за зголемување на одбранбената подготвеност на Европа до 2030 година, со цел Унијата да може автономно да се справува со непосредни и идни закани.
Лидерите на ЕУ повикаа на изградба на целосен спектар од модерни одбранбени капацитети, во координација со НАТО, за намалување на стратешката зависност, надополнување на празнини во одбраната и зајакнување на европската технолошка и индустриска база.
Во заклучоците се нагласува потребата од заштита на копнените, воздушните и морските граници, особено на источниот дел од Унијата, и обезбедување конкретна поддршка за земјите членки. Европскиот совет истакна дека хибридните закани од Русија и Белорусија бараат засилена соработка меѓу земјите членки за зајакнување на нивните одбранбени и безбедносни капацитети.
Посебно внимание е посветено на заштита на критичната инфраструктура – енергетската, дигиталната и подводната, како и на подобрување на противвоздушната одбрана и капацитетите за борба против дронови. Лидерите ја истакнаа важноста од развој на европската одбранбена индустрија, со зголемени инвестиции и мобилизација на инструментите „Безбедносна акција за Европа“ (САФЕ) и „Програма за европска одбранбена индустрија“ (ЕДИП).
Во документот се нагласува и соработката со Украина, особено во иновациите и најсовремената одбранбена технологија, како и потребата од ефикасен политички надзор, координација од министрите за одбрана и зајакнување на Европската агенција за одбрана.
Европскиот совет потсетува дека посилна и поспособна ЕУ во областа на безбедноста и одбраната ќе придонесе кон глобалната и трансатлантската безбедност и ќе биде комплементарна на НАТО, кој останува основа за колективната одбрана на своите членки.
