Американските санкции кон Русија, објавени од претседателот Доналд Трамп, веќе започнаа да даваат резултати, откако големи кинески и индиски компании привремено го прекинаа увозот на руска сурова нафта, јавува „Ројтерс“.
Кинеските енергетски компании „ПетроКина“, „Синопек“, „ЦНООК“ и „Женхуа Оил“ одлучиле да ја суспендираат трговијата со Русија поради страв од секундарни санкции и можни проблеми со меѓународните плаќања и осигурувањето на транспортот.
Индискиот најголем купувач на руска нафта, „Рилианс Индустрис“ на Мукеш Амбани, сега планира да го намали или целосно да го запре увозот за да се усогласи со санкциите. И државните рафинерии во Индија, вклучувајќи ги „Индијан Оил“ и „Бхарат Петролеум Корп“, ги прекинуваат директните набавки од „Роснефт“ и „Лукоил“.
Овој потег е значаен бидејќи Индија е еден од најголемите увозници на руска нафта, а „Роснефт“ и „Лукоил“ сочинуваат околу половина од извозот на нафта на Русија. Експертите предупредуваат дека санкциите може да ја намалат руската добивка од нафта, но и да ја зголемат конкуренцијата на глобалниот пазар и цените на нафтата.
Хелима Крофт од „РБЦ Капитал Маркетс“ истакна дека политиката на САД е дизајнирана да избегне сериозно нарушување на руските резерви, но дополнителните ограничувања би можеле да влијаат на глобалниот пазар на енергенти.
