Коалицијата ВЛЕН реагира на обидите на, како што велат, „разбиената и дезориентирана ДУИ“ да ги претстави локалните избори од 19 октомври како парламентарни, оценувајќи дека тоа е доказ дека овој коалициски блок не изгубил само гласови, туку и контакт со реалноста.
„Овие избори беа локални. Токму тука, Албанците зборуваа појасно од кога било – избраа промена, избраа ВЛЕН. Во повеќе од десет општини, граѓаните им го доверија гласот на новата енергија, на луѓе што работат, а не се кријат зад лажен патриотизам кога немаат што да им понудат на луѓето. Тие ја избраа политиката на резултати, а не политиката на страв“, се наведува во соопштението.
Од ВЛЕН додаваат дека „ниту телевизиските интерпретации со превртени фигури“ не можат да го изменат фактот дека движењето ја покрива целата политичка карта на Албанците во Македонија.
„Тоа е единствената карта што вреди – картата на слободната волја на граѓаните“, порачаа од ВЛЕН.
Во реакцијата се спомнуваат и изјавите на Арбер Адеми, Блерант Рамадани и Кренар Лога, кои, според ВЛЕН, „со имагинарни графикони за идни пратеници кои никогаш нема да ги видиме“, само ја покажуваат паниката што владее во редовите на АКИ.
„Тие сè уште не ја разбрале пораката на народот – време е за реформи, не за бајки за да ги држите вашите милитанти будни“, стои во реакцијата.
Од ВЛЕН потсетуваат дека четири дена по изборите, лидерот на ДУИ, Али Ахмети, не се појавил јавно. „Можеби сè уште чека да му ги соопштат резултатите од ‘референдумот’. На Адеми, Рамадани и Лога им посакуваме што почести јавни настапи – секој пат кога зборуваат, ДУИ губи по илјада гласа. А ние, искрено, немаме ништо против“, завршува соопштението на ВЛЕН.
