Хрватската полиција уапси 29-годишен државјанин од западна Хрватска, осомничен дека организирал и раководел со меѓународна педофилска мрежа со повеќе од 250 членови од различни земји. Истрагата ја спровеле Полициската управа Приморје–Горски Котар и Службата за сајбер безбедност, во соработка со австралиската полиција и Европол.
Осомничениот е обвинет за повеќе тешки кривични дела – сексуална злоупотреба и експлоатација на деца, создавање и дистрибуција на детска порнографија и нарушување на приватноста на малолетници.
Истражителите откриле дека преку апликации со енкрипција тој управувал со онлајн група каде се разменувале материјали со сексуална злоупотреба на деца. Во неговите уреди биле пронајдени над 250 фотографии и видеа, а полицијата потврдила дека имал експлицитни онлајн контакти со најмалку 30 деца – 20 од Хрватска и околу 10 од странство.
Некои од тие разговори се одвивале додека децата биле дома со родителите или дури за време на училишни часови.
Случајот бил откриен по дојава од австралиската полиција, која преку Европол доставила информации што воделе до IP адреса во Хрватска. Податоците биле потврдени и од Американскиот центар за исчезнати и експлоатирани деца (NCMEC).
Хрватската полиција брзо го идентификувала осомничениот, а едно од децата-жртви веќе е пронајдено и добило стручна помош. Истрагата продолжува со цел да се идентификуваат сите жртви и соработници во мрежата.
