Аргентина, втората најголема држава во Јужна Америка, утре излегува на избори за половина од пратениците и третина од сенаторите, во гласање што ќе биде тест за популарноста на претседателот Хавиер Милеј – и своевиден референдум за американската финансиска поддршка.
Американскиот претседател Доналд Трамп отворено порача дека Вашингтон ќе одобри заем од 20 милијарди долари за стабилизирање на аргентинската валута само ако Милеј победи.
– „Нема да си го трошиме времето ако Милеј не победи“, изјави Трамп по средбата со аргентинскиот лидер во Белата куќа.
Опозицијата остро реагираше, обвинувајќи го Трамп за уцена и мешање во изборите, а Милеј – за предавство. Меѓународните медиуми како Ројтерс, Би-Би-Си и Гардијан предупредуваат дека ваквиот пристап на САД може да доведе до нова геополитичка поделба, доколку Аргентина се сврти кон Кина или ЕУ.
Милеј, познат по своите радикални економски реформи наречени „моторна пила“, ја намали државната потрошувачка за 30%, укина министерства и субвенции и отпушти илјадници јавни службеници. Резултатот: повисок кредитен рејтинг, но и зголемена сиромаштија и рецесија.
Анкетите му даваат околу 50% поддршка, но земјата е длабоко поделена – богатите и младите го поддржуваат, а работничката класа му се спротивставува.
На изборите ќе се избираат 127 пратеници и 24 сенатори, а иако партијата на Милеј води во анкетите, најверојатно ќе мора да формира коалиција за да ги продолжи реформите.
Во земјата има 36 милиони гласачи, а гласањето е задолжително за сите од 18 до 70 години.
