Во страшна сообраќајна несреќа која се случила во ноќта меѓу сабота и недела во Нов Белград, животите ги загубиле тројца членови на едно семејство – мајка, татко и нивното дете. Трагедијата се случила на крстосницата меѓу улиците Хероја со Кошара и Омладинских бригада, објави Nova.rs.
Според првичните информации, несреќата ја предизвикал 24-годишниот Никола Ѓ., државјанин на Босна и Херцеговина, кој управувал со „Ауди“ со босански регистарски таблички под дејство на алкохол. Тој со голема брзина поминал низ црвено светло и директно се забил во автомобилот „Хјундаи“ во кој се наоѓала семејната тројка – таткото Б.Ж. (1982), кој бил сообраќаен полицаец, мајката Д.К. (1987) и нивното дете Ж.М. (2016).
Од силината на ударот биле урнати два столба на јавната расвета и семафорот, а остатоци од возилата биле расфрлани низ коловозот. И покрај брзата интервенција на итната помош, на тројцата патници од „Хјундаиот“ не им можело да им се помогне.
Алкотестот покажал дека возачот имал 1,17 промили алкохол во крвта. Тој е приведен и му е одредено задржување до 48 часа, а против него ќе биде поднесена кривична пријава за тешко дело против безбедноста на јавниот сообраќај.
Министерот за внатрешни работи на Србија, Ивица Дачиќ, соопшти дека сувозачот од „Ауди“-то е повреден и хоспитализиран.
„Изразувам најдлабоко сочувство до семејствата на загинатите и нагласувам дека ќе продолжиме со најстроги контроли и санкции кон сите кои со своето неодговорно однесување ги загрозуваат животите на граѓаните“, изјави Дачиќ.
Очевидец за белградскиот „Блиц“ изјавил дека возачот со голема брзина „прелетал“ низ црвено светло и директно се забил во семејниот автомобил. „Сум видел многу несреќи, но ова беше најужасното нешто досега“, раскажал сведокот.
