Русија успешно го тестираше својот крстосувачки проектил на нуклеарен погон Буревестник, способен да носи нуклеарна боева глава. Претседателот Владимир Путин изјави дека проектилот може да го избегне секој постоечки и идниот систем за противракетна одбрана и дека наскоро ќе започне со негово распоредување.
Рускиот генерал Валериј Герасимов, началник на Генералштабот на руските вооружени сили, информираше дека проектилот на 21 октомври прелетал 14.000 километри и бил во воздух околу 15 часа. Според руските власти, проектилот 9М730 Буревестник – кој НАТО го нарекува SSC-X-9 Skyfall – е „непобедлив“ за постоечките и идните противракетни системи, со речиси неограничен дострел и непредвидлива траекторија на летот.
„Ова е уникатно оружје кое никој друг на светот не го поседува“, изјави Путин, облечен во камуфлажна униформа на состанок со генерали кои ја надгледуваат војната во Украина. Тој додаде дека претходно некои руски експерти сметале дека вакво оружје веројатно никогаш нема да може да се направи, но сега е завршено неговото „клучно тестирање“.
Герасимов истакна дека овој тест бил посебен поради големата далечина на летот на проектилот и дека тој би можел да ги порази сите системи за противракетна одбрана.
Путин претходно ја надгледуваше вежбата на руските стратешки нуклеарни сили на копно, море и воздух, со цел проверка на нивната готовност и командна структура. „Нашите модерни нуклеарни сили за одвраќање се на највисоко ниво“, додаде претседателот, нагласувајќи дека нивото е повисоко од било која друга нуклеарна сила.
Русија и САД заедно поседуваат околу 87 отсто од светскиот нуклеарен арсенал, доволен за неколкукратно уништување на светот. Русија има 5.459 нуклеарни боеви глави, а САД 5.177, според Федерацијата на американски научници (FAS). Путин истакна дека стратешките сили се способни целосно да ја зачуваат националната безбедност на Русија и на Сојузот Русија–Белорусија.
