Црна Хроника

Скопјанец извршил разбојништва во ГТЦ и Стара чаршија, пиштолот го фрлил во Вардар

Јавен обвинител од Основното јавно обвинителство Скопје започна истражна постапка против 25-годишен скопјанец за две одвоени кривични дела – разбојништво со закана со огнено оружје.

На 15 август годинава, осомничениот влегол во просториите на правно лице за брзи кредити во ГТЦ, седнал на едно од столчињата и заканувајќи се со пиштол, од вработената одзел 60.500 денари. Три дена подоцна, во објект на истото правно лице во Старата скопска чаршија, со слична постапка и закана со пиштол, од вработениот одзел дополнителни 25.000 денари, а потоа го фрлил оружјето во Вардар и избегал.

По извршените разбојништва, осомничениот бил недостапен за органите на прогонот, бидејќи избегал во Хрватска. Обвинителството предупредува дека постои висок ризик тој повторно да се даде во бегство или да го повтори делото. Заради тоа, од судијата на претходна постапка е побарана мерка притвор за осомничениот.

Црна Хроника

4News: Приведен поранешниот државен правобранител – истрага за сериозни коруптивни сомнежи

Поранешниот Државен правобранител на Македонија, Фехми Стафа, вечерва е приведен во рамки на полициска акција, поради сомневања за тешко коруптивно кривично дело. Апсењето на поранешниот висок функционер, кој беше задолжен за заштита на државниот имот, предизвика силни реакции во јавноста.

Засега нема официјално соопштение од институциите, но според првични информации, постојат сериозни индиции за вмешаност во коруптивни активности.

Според неофицијални и непотврдени сознанија од истрагата, Стафа е лишен од слобода под сомнение за примање поткуп. Извори блиски до истражните органи наведуваат дека станува збор за сума од неколку десетици илјади евра, која наводно била побарана или примена со цел извршување или неизвршување службено дејствие.

Во овој момент не се соопштени детали за начинот и околностите под кои е извршено апсењето, ниту дали предметот опфаќа и други осомничени лица. Се очекува Министерството за внатрешни работи и надлежното Јавно обвинителство во текот на ноќта или утрешниот ден да информираат за случајот и за правната квалификација на делото.

Стафа на функцијата државен правобранител беше именуван како предлог на Алтернатива, а во јавноста беше поврзуван и со ДУИ. Во изминатиот период против него биле поднесувани и повеќе пријави до Финансиската полиција.

Државниот правобранител е институција задолжена за застапување и заштита на имотните и правните интереси на Република Македонија пред судовите и органите на државната управа.

Извор: 4news.mk

Црна Хроника

Осум повредени во сообраќајка на патот Гостивар–Тетово

Денеска (13.12.2025) во 20:05 часот на патот Гостивар-Тетово после клучка ,,Камењане”, настанала сообраќајна незгода помеѓу патничко возило ,,Мерцедес” со австриски регистарски ознаки и патничко возило ,,БМВ” со тетовски регистарски ознаки. Во незгодата со повреди се здобиле осум лица кои со возила на итна медицинска помош се пренесени во Клинички центар Тетово. Поради вршење на увид, сообраќајот се одвива по една коловозна лента.