Москва синоќа беше цел на масовен напад со дронови, потврди градоначалникот Сергеј Собјанин, кој цела ноќ известуваше за состојбата во рускиот главен град.
Според неговите информации, руската противвоздушна одбрана соборила 34 украински дронови кои летале кон Москва, пренесува The Kyiv Independent.
Подоцна, руското Министерство за одбрана соопшти дека вкупно биле пресретнати 193 дронови над територијата на земјата, од кои 40 над Московската област. Министерството потврди дека 34 летала биле насочени директно кон главниот град. Овие податоци, сепак, не можеа да бидат независно потврдени. Поради заканата од дронови, привремено беше прекината работата на московските аеродроми Домодедово и Жуковски.
Според руски канали на „Телеграм“, експлозии се слушале во повеќе делови од градот и околните области, меѓу кои и во населбата Комунара. Градоначалникот Собјанин изјави дека засега нема пријавени жртви, но дека итните служби се испратени на сите места каде што паднале дронови.
Во вечерните часови избувнал и пожар во нафтено складиште во Серпухово, во Московската област. Каналот Astra објави дека пожарникарските екипи успеале да го локализираат пожарот, додека локалните власти сè уште не го соопштиле причинителот на инцидентот.
Украинските власти не го коментираа најновиот напад. Киев веќе со месеци користи дронови со долг дострел за напади врз воени и индустриски цели на територијата на Русија, како што се рафинерии и фабрики за оружје. Сличен напад со 34 дронови беше регистриран и на 22 септември.
Истовремено, Русија продолжува со масовни ракетни и дронски напади врз украинските градови. Во последните две ноќи, при нападите врз Киев загинаа пет лица, а повеќе десетици беа повредени. Претседателот Володимир Зеленски изјави дека Русија во изминатите седум дена ја нападнала Украина со речиси 1.200 борбени дронови и 50 ракети.
