Рускиот нафтен гигант Лукоил најави продажба на целокупниот свој имот во странство како реакција на новиот пакет американски санкции воведени поради војната во Украина, објави The Moscow Times.
Американскиот претседател Доналд Трамп минатата недела воведе значителни санкции насочени кон Лукоил и Роснефт, двајцата најголеми руски нафтени концерни, откако Москва ја продолжи својата офанзива во Украина. Пред воведувањето на санкциите, Трамп го откажа и планираниот состанок со рускиот претседател Владимир Путин, кој новите мерки ги оцени како „означителни, но недоволни“ за да го урнат руското стопанство.
Во официјално соопштение, Лукоил потврди дека ќе го продаде својот имот во странство поради воведените рестриктивни мерки. „Компанијата објавува намера за продажба на својот меѓународен имот, а натпреварувачкиот процес веќе започна“, се наведува во соопштението.
Санкциите предвидуваат замрзнување на целиот имот на Лукоил и Роснефт во САД, како и забрана за американските компании да соработуваат со нив. Двете компании заедно сочинуваат 55% од вкупната руска нафтена продукција и се вклучени на SDN листата на санкционирани субјекти, регистар кој го следат многу земји и деловни субјекти ширум светот.
Вашингтон им дал рок од еден месец на компаниите кои соработуваат со руските нафтени концерни да ги прекинат деловните врски, во спротивно се соочуваат со секундарни санкции кои би им го оневозможиле пристапот до американските банки, трговци, бродски и осигурителни услуги.
Овие мерки доаѓаат во време на застој во мировните напори за крај на конфликтот, и покрај дипломатските активности и првите директни преговори меѓу Русија и Украина по повеќе од три години.
