Американскиот претседател Доналд Трамп оцени дека тестирањето на рускиот крстосувачки проектил на нуклеарен погон „Буревестник“ е „несоодветно“ и го повика рускиот претседател Владимир Путин да се фокусира на завршување на конфликтот во Украина.
„Ја имаме најдобрата нуклеарна подморница на светот веднаш покрај нивниот брег. Не мора да поминува 8.000 милји. Тие не си играат со нас, ниту ние со нив“, изјави Трамп за новинарите на авионот „Ер Форс Уан“.
Трамп нагласи дека војната во Украина, која требаше да трае една недела, наскоро ќе влезе во својата четврта година. „Тоа е она што треба да го прави Путин – да ја заврши војната, наместо да тестира нови ракети“, додаде тој.
Американскиот претседател истакна дека украинскиот конфликт би можел да стане „деветтата војна што ќе ја реши“. „Решив осум војни, а деветтата доаѓа. Мислам дека тоа е меѓу Русија и Украина“, рече Трамп.
На прашањето за можноста за воведување нови санкции против Русија, Трамп одговори кратко: „Ќе дознаете“, додека за прашањето за користење на замрзнатиот руски имот за финансирање на Киев посочи дека тоа е „прашање на Европската унија“.
