Македонија

ВЛЕН: Левица е последната сламка за „спас“ на Али Ахмети и АКИ

По секој пораз следи изблик на нервоза, а тоа, според движењето ВЛЕН, се потврдило токму кај лидерот на ДУИ, Али Ахмети. „Симнат од тронот, Ахмети излезе да ги навредува Албанците – почна со ‘кучиња’, а заврши со ‘Газиместан’. Тоа е вистинскиот лик на Ахмети, без пропаганден филтер и без телепромптерот на Груби“, стои во реакцијата на ВЛЕН.

Од ВЛЕН нагласуваат дека нивната победа во Чаир, Сарај, Арачиново, Желино и Теарце, како и предноста во Тетово, Боговиње, Дебар, Струга, Брвеница и Долнени, целосно го разголиле „лажниот патриотизам“ на тројката во агонија – Ахмети, Таравари и Села.

„На крај, тие завршија во прегратка со проруската и анти-НАТО партија Левица. Тоа е последната сламка на спас за Али Ахмети, Зијадин Села и Арбен Таравари,“ се вели во соопштението.

ВЛЕН потсетува дека кандидатот на АКИ, Арсим Далипи, кој ветил дека ќе се повлече од трката доколку добие една глас помалку од Менди Ќира, не го исполнил ветувањето и сега е во отворен коалициски сојуз со партијата на Димитар Апасиев.

„ВЛЕН одамна предупреди на средбата меѓу пратеникот на Ахмети, Кренар Лога, и лидерот на Левица, Димитар Апасиев, како дел од планот за нанесување штета на независниот кандидат поддржан од ВЛЕН, Менди Ќира, уште во првиот изборен круг. Денес сè излегува на виделина,“ додава движењето.

„Арсим Далипи со ‘референдумот’ во рака и ‘националната кауза’ во уста, заедно со ‘патриотите’ Таравари и Села, најдобро покажуваат дека нивната кауза никогаш не била албанска. Зашто, којшто се прегрнува со Левица, му го врти грбот на НАТО, на Западот и на самите Албанци,“ порачува ВЛЕН.

Македонија

Пролетни температури во декември: Сончевото топло време во текот на целата седмица

Продолжува доминацијата на високиот воздушен притисок, односно Антициклонот, кој и оваа седмица ни носи пролетно време.

Заборавете на студената зимска идила – времето останува стабилно и суво, а деновите ќе бидат натпросечно топли, иако утрата ќе бидат спартански ладни. Термометрите на повеќе места наутро ќе се спуштаат до минусни температури, што налага внимателно облекување пред изгрејсонце.

Сепак, не секаде ќе биде сончево. По котлините и речните долини, особено во текот на ноќта и утрото, маглата и ниската облачност ќе создаваат густа завеса. Овој феномен нема да ја заобиколи ниту Скопската котлина, каде што во утринските часови се очекуваат значително отежнати услови за сообраќај.

Дневните температури се вистински шок за декември. На повеќе места тие упорно ќе надминуваат 10 степени, додека во југоисточните предели живата може да скокне и до околу 15 степени. Ова значи само едно: невообичаено високите температури за овој период од годината продолжуваат да го одбележуваат целиот работен и празничен дел од седмицата.

Меѓутоа, оваа стабилна доминација се чини дека ќе биде прекината кон крајот на седмицата. Во сабота, на 20 декември, се очекува позначителна облачност и појава на повремен локален дожд. Подгответе се за мала промена на плановите за викендот.

Македонија

Кадровски „ресет“ во СДСМ: Утре се избира новото партиско раководство

СДСМ утре ќе го официјализира новото партиско раководство, по турбулентниот почеток на декември кога, на барање на претседателот Венко Филипче, целото раководство поднесе оставка. Потег што од партијата го опишаа како „одговорен и морален“, а кој отвори простор за темелно кадровско рестартирање.

Филипче најави дека списокот со новите потпретседатели и членовите на Извршниот одбор е веќе затворен и дека јавноста утре ќе дознае кои лица ќе ја водат партијата во наредниот период. Според него, станува збор за внимателно избалансирана комбинација од искусни партиски кадри и млади луѓе со нова енергија.

„Се избира ново раководство – нови потпретседатели и нов Извршен одбор. Практично, нова сила во партијата, спој на искуството и младоста“, изјави Филипче во централниот дневник на „Сител“.

Лидерот на СДСМ најави и поширока офанзива надвор од партиските рамки – отворен фронт со граѓаните, политичките актери и граѓанскиот сектор, со цел, како што рече, да се стави крај на криминалната власт во државата.

Потсетуваме, на 2 декември, по иницијатива на Филипче, целото раководство на СДСМ поднесе оставка, со што започна процес на внатрешна реорганизација. Од партијата тогаш порачаа дека следува период на кадровско освежување, организациско зајакнување и вклучување на нови лица.

Утрешниот ден, според најавите, треба да ја покаже новата слика на СДСМ – со нови луѓе, нова поставеност и амбиција партијата повторно да се позиционира како силен политички играч на сцената.

Македонија

Новогодишното украсување на Општина Тетово за 25.000 евра

Со мнозинство во Советот на Општина Тетово, на вонредна седница одржана онлајн доцна вчера попладне, се изгласа мнозинство иницијативата за празнично украсување на градот, одвојувајќи дарежливи 1.500.000 денари или речиси 25.000 евра за таа цел.

Оваа одлука, која претставува измена и дополнување на Програмата за активности во областа на културата за 2025 година, стави крај на долгогодишната „суша“ на новогодишна декорација.

Програмата беше изгласана со силната поддршка на советничкото мнозинство, составено од Коалицијата Вреди и ВМРО-ДПМНЕ.

„За оваа програма ‘за’ гласаше советничкото мнозинство составено од Коалицијата Вреди и ВМРО-ДПМНЕ… Со оваа одлука, Општина Тетово ја потврдува намерата градот да добие празничен сјај за крајот на 2025 година“, ентузијастички информираше претседателот на Советот, Јусуф Абдули.

Сепак, одлуката не помина без отпор. Против гласаа советниците од коалицијата НАИ, додека воздржани останаа советниците од Подобро за Тетово, Левица и СДСМ, потенцирајќи ја политичката поделба околу приоритетите.

Оваа одлука е особено значајна, бидејќи доаѓа по цели години во кои улиците и градскиот плоштад остануваа мрачни за време на празниците.

Во последните години од вториот мандат на поранешната градоначалничка Теута Арифи, и за време на целиот прв мандат на актуелниот градоначалник Билал Касами, официјалното образложение беше идентично: дека општината немала пари за новогодишни украси. Сега, со обезбедените 25.000 евра, градот е подготвен да ја прекине оваа непразнична традиција и да ја врати магијата на улиците.