СВР Скопје денеска поднесе кривична пријава против С.Р. (38), в.д. директор на ЈП „Комунална хигиена“ – Скопје, и А.С. (55), управител за отпад, поради сомнение за кривично дело „загрозување на животната средина и природата со отпад“ според член 230 став 1 од Кривичниот законик.
Според истрагата, осомничените не ги почитувале законските обврски за собирање и транспортирање на отпадот, како и редовните активности предвидени во Оперативната програма за управување со комунален отпад и во Оперативниот план за јавна чистота на Градот Скопје. Недоволниот надзор и непрописното управување со отпадот довеле до формирање на мали депонии на јавни и сообраќајни површини, што го нарушило квалитетот на почвата, воздухот и водата и го загрозило здравјето на граѓаните.
Сомневањата се потврдени со вонредни инспекциски надзори и со експертско мислење од ЈЗУ Институт за јавно здравје, кое укажува на ризикот од ширење заразни заболувања поради непристојното управување со отпадот.
