Украинскиот претседател Володимир Зеленски соопшти дека руските сили ја насочиле својата главна офанзива кон градот Покровск во регионот Донецк, каде што се водат интензивни борби и во самиот град.
„Разговарав со војската – посебно внимание се посветува на Покровск и соседните области“, изјави Зеленски, нагласувајќи дека таму се концентрирани најголем дел од руските ударни сили и најсилната офанзивна активност.
Тој истакна дека Покровск е главната цел на руските трупи и дека секој успех на украинската армија во оваа насока е од клучно значење за одбраната на целата држава.
Според украинските воени извори, само во текот на вчерашниот ден се регистрирани 101 борбен судир меѓу украинските и руските сили, со најжестоки напади во Костјантинивска и Покровска област, како и зголемена активност на фронтот кај Александровск.
