Министерката за енергетика, рударство и минерални суровини, Сања Божиновска, истакна дека гасниот интерконектор меѓу Северна Македонија и Србија ќе создаде нова енергетска оска на стабилност за целиот регион.
На средба со Јована Јоксимовиќ од српското Министерство за рударство и енергетика, Божиновска разговарала за забрзување на сите активности и технички чекори за реализација на проектот, кој ќе овозможи поврзување на гасните системи на двете земји и пристап до алтернативни извори на гас.
„Овој интерконектор е дел од поголема визија – регион кој е енергетски сигурен, поврзан и европски ориентиран. Секој ден побрза реализација значи повеќе стабилност, предвидливост и независност за граѓаните и економијата“, рече Божиновска.
Таа додаде дека со овој проект енергетската карта на регионот се редефинира, а Македонија станува активен дел од процесот на регионално енергетско поврзување.
