Во Хрватска денеска започна голема полициска акција за контрола на сообраќајот, во која за првпат се користат беспилотни летала. Дроновите летаат над патиштата низ целата земја и имаат за цел да ја зголемат безбедноста и дисциплината кај возачите.
Акцијата вклучува максимален број полицајци и целата достапна опрема, а дроновите ги управуваат специјално обучени службеници. Со нивна помош полицијата ќе открива сообраќајни прекршоци како поминување на црвено светло, користење мобилен телефон за време на возење, непоставување безбедносен појас, пребрзо возење и управување под влијание на алкохол или дрога. Особено внимание ќе се посвети и на возачите на мопеди и мотоцикли, каде честопати се забележуваат опасни маневри.
Дроновите можат да останат во воздух околу половина час и имаат домет до 20 километри. Опремени се со сензори за избегнување пречки и висококвалитетни камери кои овозможуваат јасно препознавање на возачите и нивните постапки.
Од полицијата појаснуваат дека целта не е санкционирање по секоја цена, туку предупредување и подигање на свеста за безбедност во сообраќајот, со акцент на превенција и заштита на човечки животи.
Во повеќе земји на ЕУ веќе се тестира или се разгледува употребата на дронови за сообраќаен надзор, а главниот предизвик е да се постигне рамнотежа меѓу безбедноста и заштитата на приватноста на граѓаните.
