Во масовна полициска операција во фавелите на северниот дел од Рио де Жанеиро загинаа најмалку 64 лица, меѓу кои и четворица припадници на полицијата. Според бразилскиот портал „Глобо“, акцијата е насочена против озлогласената банда „Црвена команда“, една од најстарите и најнасилните криминални групи во градот.
Полицијата уапсила 81 лице и запленила голема количина оружје и муниција. Војната на улиците започнала кога припадниците на бандата отвориле оган кон специјалните единици, запалиле барикади и користеле беспилотни летала со експлозив за напад на полицијата.
Во акцијата учествувале околу 2.500 полицајци, што ја прави една од најголемите безбедносни операции во последните години во Рио де Жанеиро. Властите соопштија дека операцијата ќе продолжи сè додека не се воспостави контрола врз областа, која долго време е под влијание на организираниот криминал.
