Зеленски ја обвини Кина дека ѝ помага на Русија – откри што и дала Кина на Русија

Украинскиот претседател Володимир Зеленски изјави дека Кина ѝ испорачува на Русија машини за производство на оружје и ја повика да ја прекине таа поддршка, користејќи го своето влијание за да ја поттикне Москва кон мир.

Говорејќи во Киев по средбата со холандскиот министер за надворешни работи Давид ван Виел, Зеленски потсети дека претходно добил уверувања од кинескиот претседател Си Џинпинг дека Пекинг нема да снабдува Русија со оружје.

„Нашите разговори беа јасни — Си Џинпинг ме увери дека оружје нема да биде продадено на Русите. Но гледаме дека Кина ѝ дала машини за производство на оружје на Руската Федерација, дека помага во заобиколување на санкциите и дека има кинески платеници кои се бореле против украинската војска“, изјави Зеленски, пренесе агенцијата Ukrinform.

Тој нагласи дека Кина наместо да го поддржува продолжувањето на војната, треба да изврши притисок врз Москва за да ја прекине агресијата.

Изјавата на Зеленски доаѓа по најавата на американскиот претседател Доналд Трамп дека ќе разговара со Си Џинпинг за руската војна против Украина за време на нивната средба во Јужна Кореја на 30 октомври. Трамп изјави дека кинескиот лидер има големо влијание врз Путин и дека ќе го повика да престане со купување руска нафта.

Кина ги негира обвинувањата за воена поддршка на Русија, но сè повеќе е под лупа на Западот поради испораките на технологии со „двојна намена“ во услови на тековни санкции.