Потпретседателот на САД, Џеј Ди Венс, изјави дека тестирањето е неопходно за правилно функционирање на американскиот нуклеарен арсенал, еден ден откако претседателот Доналд Трамп најави повторно започнување на вакви тестирања.
„Имаме значаен арсенал, тоа е јасно. Русите имаат значаен нуклеарен арсенал. Кинезите имаат значаен нуклеарен арсенал. Понекогаш треба да се тестира за да бидете сигурни дека е оперативен и функционира правилно“, рече Венс пред новинарите во Белата куќа.
Тој додаде дека, иако знаат дека арсеналот функционира, тоа мора да се следи со текот на времето. Ден претходно, Доналд Трамп на својата платформа Truth Social објави дека, поради тестирачки програми на други земји, побарал од Пентагон „рамноправно да започне тестирање на нашето нуклеарно оружје“. Неговиот коментар се однесуваше на Кина и Русија и следеше по серија најави на Владимир Путин за развој на ново нуклеарно оружје.
Сепак, ниту Трамп, ниту потпретседателот Венс не прецизираа каков вид тестирања е предвидено, што предизвика загриженост кај меѓународната заедница. „Мислам дека објавата на претседателот на Truth говори сама за себе“, рече Џеј Ди Венс.
