Пробиштип станува град на младите претприемачи, најави Тоневски

Кандидатот за градоначалник на Општина Пробиштип од редовите на ВМРО-ДПМНЕ, Тони Тоневски, најави формирање на бизнис инкубатор и специјализирана канцеларија во рамки на општинската администрација, која ќе работи исклучиво на подготовка и реализација на домашни и меѓународни проекти за поддршка на младите.

„Ќе направиме еден бизнис инкубатор каде ќе ги вклучиме младите и ќе отвориме една канцеларија во општината којашто ќе биде дел од администрацијата задолжена да работи исклучиво на програми, и домашни и меѓународни, фондови од каде може да се извлечат пари независно од овие што ги имаат сега“, изјави Тоневски.

Тој додаде дека општината ќе им помогне на младите при изготвување на проектни апликации, а за таа цел ќе бидат назначени службеници кои ќе работат исклучиво на овој процес. „Ние како општина да им помагаме на младите да ги спремаат тие апликации, ќе има задолжени луѓе од администрацијата кои ќе работат исклучиво на тој проблем“, рече Тоневски.

Во неговата визија за развој на Пробиштип, младите имаат централно место. Тој најави едукативни обуки и семинари во земјата и странство за зголемување на нивните знаења и претприемачки вештини. Според Тоневски, целта не е младите да зависат од поддршката на општината, туку да станат самостојни.

„Со двесте илјади денари е никаква помош за младите. Јас можам да кажам дека со петсто илјади ќе ги помогнам, меѓутоа суштината е да ги научиме и натераме младите сами да се снаоѓаат и да аплицираат“, потенцираше тој, осврнувајќи се на досегашната пракса на локалната власт. „Целта е да им помогнеме на сите млади коишто сакаат да почнат некој бизнис да можат со помош на општината и поддршка на општината да ги добијат тие средства.“, заокружи Тоневски, кандидатот за градоначалник на Општина Пробиштип од редовите на ВМРО-ДПМНЕ кој имаше блага предност во првиот круг на локалните избори.