Во најновите руски ракетни и дрон-напади врз Украина, повредени се најмалку 11 лица, а голем дел од земјата остана без електрична енергија, соопштија украинските власти во четвртокот.
Во југоисточниот град Запорожје, руските сили испукаа повеќе проектили кои погодиле станбени згради, изјави шефот на регионалната воена управа Иван Федоров.
„Бројот на повредени во непријателскиот напад на Запорожје се искачи на 11. Меѓу нив има и шест деца – три девојчиња и три момчиња, на возраст од три до шест години,“ напиша Федоров на Телеграм.
Министерката за енергетика на Украина, Свитлана Гринчук, изјави дека Русија повторно спроведува масовен напад со ракети и дронови врз енергетската инфраструктура на земјата.
„Штом ќе биде можно, спасувачките екипи и техничарите ќе почнат со санација на штетите, обновување на електричната мрежа и проценка на последиците,“ напиша таа на Фејсбук.
Во повеќето украински региони се воведени вонредни прекини на снабдувањето со струја, потврди државниот оператор Укрeнерго.
Од руското Министерство за одбрана соопштија дека во текот на ноќта биле соборени 170 украински дронови, меѓу кои 48 во Брјанската област на границата со Украина и девет во Московскиот регион, од кои шест се движеле кон главниот град.
Русија одржува постојани напади со ракети и дронови, главно насочени кон украинската енергетска инфраструктура, додека продолжува инвазијата што започна во февруари 2022 година.
Украина, пак, сè почесто одговара со напади врз руски рафинерии и енергетски објекти.
Во меѓувреме, американскиот претседател Доналд Трамп се обидува да постигне договор за прекин на непријателствата откако се врати во Белата куќа во јануари, но засега разговорите не донеле значителен напредок, пренесува AFP.
