Црна Хроника

Трагедија на патот Белград – Нови Сад: Загина млад џудист, осум лица тешко повредени

Тешка сообраќајна несреќа се случи утрово околу 3:47 часот на патот Белград – Нови Сад, во која животот го загуби 16-годишен џудист од клубот „Партизан“ од Белград, а осум лица се повредени, меѓу кои и возачот на комбето.

Според првичните информации, од засега непознати причини, се превртело патничко комбе марка „Опел Виваро“ со кое управувал С.С. (43). Во возилото се наоѓале осум малолетници, на возраст од 13 до 16 години, сите членови на џудо клубот „Партизан“, кои се враќале од меѓународен спортски камп и натпревар во Азербејџан.

Еден од патниците, 16-годишен спортист, починал на местото на несреќата. Повредените биле итно пренесени во Клиничкиот центар „Војводина“ во Нови Сад, каде им е укажана лекарска помош.

Полицијата изврши увид на местото на несреќата по наредба на јавен обвинител. Алкотестот покажал дека возачот не бил под дејство на алкохол.

Министерството за внатрешни работи на Србија соопшти дека истрагата за причините на трагедијата е во тек.

Црна Хроника

Исчезна 30-годишен скопјанец

На 15.12.2025 во 01:50 часот во Полициската станица Гази Баба, И.Т.(51) од с.Инџиково, скопско, пријави дека од домот се оддалечил неговиот син А.Т.(30).

Се преземаат мерки за пронаоѓање на лицето.

Црна Хроника

Примил мито од 50.000 евра за да влијае кај судија – МВР со детали

Полициски службеници по наредба на јавен обвинител од Основното јавно обвинителство за гонење на организиран криминал и корупција го лишија од слобода Ф.С. поради сторено кривично дело – Примање награда за противзаконито влијание.

Во периодот од октомври до 13.12.2025 година осомничениот примил вкупен износ од 50.000 евра за да посредува и да го искористи своето реално влијание за да интервенира кај судија во Апелациониот суд Скопје и за со поткуп кон судијата да влијае за да се изврши службено дејствие што не би смеело да се изврши.

Првично, осомничениот побарал 100.000 евра за да влијае за укинување на мерка притвор определена кон лице кое е недостапно на органите на прогонот и против кого ОЈОГОКК води друга постапка за кривични дела против јавните финансии, платниот промет и стопанството. На 06.10.2025 година примил дел од побараниот износ и тоа 30.000 евра, што му ги предала сестрата на лицето во бегство. На 13.12.2025 година директно побарал и примил уште 20.000 евра како дел од поткупот што го барал за да го даде на судијата.

Непосредно по примањето на паричните средства осомничениот е лишен од слобода и кај него се пронајдени парите.

Црна Хроника

Лажен полицаец измами старица за 23.300 евра, уапсен на граница

Полицијата од Опатија уапси 46-годишен хрватски државјанин кој измами 79-годишна жена за 23.300 евра. Измамникот се претставувал како полицаец и ја убедил старицата дека истражува хакерски напад врз нејзините банкарски сметки. Тој ја натера да ги подигне сите свои пари за наводна проверка на истрагата.

На 12 декември, жртвата му ги предала парите пред својата куќа, по што измамникот се обидел да ја напушти земјата. Благодарение на брза и координирана акција на полицијата, тој бил уапсен на граничниот премин во Брод-Посавина, а целата украдена сума веднаш била вратена на сопственичката.

Против осомничениот е поднесена кривична пријава, тој е предаден на надзорникот на притвор, а истрагата продолжува.