Турски угостител во Црна Гора со порака по нападите: „Не создавам хаос, само работам за своето семејство“

По серијата инциденти во кои беа запалени ресторани во Бар, локалната заедница, странците и општинските власти се обединија за да им помогнат на турските граѓани кои беа цел на нападите. Иако пожарите беа брзо изгаснати, причинета е значителна материјална штета, јави весникот „Вијести“.

Харун Каја, сопственик на ресторан за брза храна во центарот на Бар, на вратата постави порака: „Јас заработувам пари за моето семејство тука. Не создавам хаос и не се тепам“. Тој изјави дека со овој гест сака да покаже дека е мирен човек кој само сака чесно да работи. Каја, татко на три ќерки, живее во Бар веќе две години и верува дека напаѓачот не е од градот, бидејќи, како што вели, „луѓето овде не се такви“.

Граѓаните на Бар, заедно со странци што живеат во градот, веднаш реагираа – некои дојдоа со храна и пари, други понудија физичка помош. Каја им се заблагодари на пожарникарите за брзата интервенција и најави дека наскоро повторно ќе го отвори својот локал.

Сличен напад доживеа и Џенгиз Гузели, сопственик на барот „Ливела“, кој изјави дека штетата во неговиот објект изнесува околу седум илјади евра. Тој додаде дека пожарот бил предизвикан на идентичен начин – со цигла и молотов коктел фрлен низ скршено стакло.

Новинарот Срдан Косовиќ, кој прв ја покрена иницијативата за помош, изјави дека граѓаните треба да покажат дека во Бар има повеќе раце подготвени да помогнат отколку тупаници што уништуваат. Општината Бар најави дека ќе им обезбеди финансиска помош на двајцата угостители, а неколку компании веќе понудија донации во градежен материјал.

Според информациите на „Вијести“, полицијата сè уште трага по сторителот, кој за време на нападите бил маскиран со фантомка и ракавици.

Инцидентите доаѓаат во време на зголемени тензии во Црна Гора, по нападот во Подгорица во кој беа вмешани странски државјани, по што Владата привремено го укина безвизниот режим за турските граѓани. Во главниот град беа уапсени осум лица под сомнение за поттикнување национална омраза и насилство.

И покрај тешките настани, граѓаните на Бар со својата реакција покажаа пример на солидарност и човечност, испраќајќи јасна порака дека насилството нема место во нивната заедница.