Скопје

ИНТЕГРА официјално го поддржа Орце Ѓорѓиевски за градоначалник на Скопје

ИНТЕГРА официјално ја објави поддршката за Орце Ѓорѓиевски во вториот круг од локалните избори за градоначалник на Скопје. Според изјавата на претседателот на ИНТЕГРА, Љупчо Ристовски, изборот за градоначалник на главниот град е од исклучително значење за животот на граѓаните и за угледот на државата, бидејќи Скопје има амбиција да се развие во современа метропола.

„Во изборот помеѓу левата глобалистичка и неолиберална опција и новата визија на човек кој покажа резултати во Кисела Вода и остава впечаток на амбицозен, искрен и коректен политичар кој си стои на зборот, ИНТЕГРА одлучи да го поддржи Орце Ѓорѓиевски. Даваме шанса за нови процеси, за поинаква визија и за поубаво Скопје“, истакна Ристовски.

Заедно со објавата на поддршката, ИНТЕГРА сподели и промотивно видео со кандидатот на ВМРО-ДПМНЕ, со цел да ги информира граѓаните за плановите и визијата на Ѓорѓиевски за главниот град.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.

Република

Системот „Безбеден град“ ќе санкционира само сериозни прекршоци, најавува Тошковски

Министерот за внатрешни работи Панче Тошковски истакна дека системот „Безбеден град“ ќе се спроведува со прецизно дефиниран праг на толеранција, со цел зголемување на безбедноста во сообраќајот и јавниот простор, а не казнување по секоја цена.

Тошковски нагласи дека системот ќе биде насочен кон препознавање и санкционирање на сериозни и опасни прекршоци, особено оние кои директно го загрозуваат животот и безбедноста на граѓаните. Според него, целта е да се воспостави ред и превенција, а не репресија без разум.

„Ќе има јасни правила, транспарентност и точно утврдени критериуми. Граѓаните ќе знаат што се санкционира и зошто. Системот нема да биде лов на прекршители, туку алатка за заштита на човечки животи“, потенцираше министерот.

Проектот „Безбеден град“ предвидува користење на современи технолошки решенија, камери и софтвер за следење на сообраќајот, со што ќе се подобри контролата и ќе се намали бројот на сообраќајни несреќи.

Министерството најави дека имплементацијата ќе оди фазно, со претходна информираност на јавноста и соодветен период за прилагодување, со цел граѓаните навремено да се запознаат со новиот систем и неговото функционирање