Истражувањето покажало: Ова е најдоброто време за појадок доколку сакате да живеете подолго

Времето на појадок е поважно отколку што сте мислеле. Ново истражување покажува дека доцнењето со првиот оброк во денот може да го зголеми ризикот од хронични болести и предвремена смрт.

Редовната утринска рутина и појадокот во рок од еден до два часа по будењето се поврзуваат со подобро здравје и долговечност, пишува Health.com.

Истражувањето траело повеќе од 20 години

Биле анализирани речиси три илјади возрасни лица на возраст од 42 до 94 години од Обединетото Кралство, и тоа во текот на две децении. Резултатите, објавени во списанието Communications Medicine, покажале дека со текот на годините времето на оброците постепено се поместува кон покасни часови.

Секоја деценија од животот носела во просек:
+8 минути покасен појадок
+4 минути покасна вечера

Клучниот наод: Секој еден час задоцнување со појадокот го зголемувал ризикот од смртност за осум до единаесет проценти, пишува Health.

Главниот автор на студијата, д-р Хасан Дашти, објаснил:
„Промените во времето на утринскиот оброк можат да бидат едноставен показател за здравствената состојба на постарите лица.“

Кога е идеално да се појадува за долговечност?

Стручњаците препорачуваат појадок во рок од еден до два часа по будењето. Причината е едноставна: метаболизмот е најактивен токму во утринските часови.

„Прескокнувањето на појадок може да доведе до нагли скокови на глукозата подоцна во текот на денот,“ истакнала д-р Кортни Питерсон од Harvard Medical School.

Таквите скокови се поврзани со:

оштетување на крвните садови

воспаленија

зголемен ризик од дијабетес тип 2 и срцеви заболувања

Усогласување со внатрешниот биолошки часовник

Редовното време на оброци помага да се одржи циркадијалниот ритам – телесниот часовник што управува со варењето, хормоните и енергијата.

„Здравиот живот подразбира и здрава исхрана, не само што јадете, туку и кога јадете,“ истакнува за Health д-р Нејт Вуд од Јејл.

Стручњаците сметаат дека пораниот појадок и вечера можат да ја намалат доцновечерната глад и прејадувањето, да го подобрат квалитетот на сонот и да го стабилизираат нивото на енергија во текот на денот.

Мали чекори за голема долговечност

Иако не е целосно докажано дека пораното појадување директно го продолжува животот, сè укажува на тоа дека тоа е силен показател за добро здравје, што доведува до подолг живот.

„Малите секојдневни одлуки прават голема разлика,“ заклучува д-р Вуд. Добар појадок во вистинско време може да стане едноставна навика што го поддржува здравјето — и тоа на долг рок.