Светот во страв по изјавата на Трамп: Дали следи нуклеарен судир?

Американскиот претседател Доналд Трамп предизвика жестоки реакции откако објави дека наложил повторно тестирање на американско нуклеарно оружје – првпат по повеќе од три децении. Обединетите нации предупредија дека ваквиот потег може да има катастрофални последици и да ја наруши глобалната стабилност.

Заменикот портпарол на генералниот секретар на ОН, Фархан Хак, изјави дека „нуклеарно тестирање никогаш не може да биде оправдано“. Изјавата доаѓа непосредно пред состанокот на Трамп со кинескиот лидер Си Џинпинг во Јужна Кореја.

Трамп на платформата Truth Social напиша дека САД мора да тестираат оружје „рамноправно со Русија и Кина“. Кремљ веднаш реагираше – портпаролот Дмитриј Песков порача дека, доколку Вашингтон го прекине мораториумот, Русија ќе одговори со исто.

Трамп со ова фактички би прекршил долгогодишна забрана за нуклеарни проби која САД ја почитуваат од 1992 година, иако договорот никогаш не бил ратификуван. Експертите за контрола на оружјето го нарекоа потегот „опасен и непромислен“, а Јапонија и Иран остро го осудија, предупредувајќи на закана за меѓународниот мир.

Трамп подоцна изјави дека „и понатаму сака денуклеаризација“, без да објасни како тоа се усогласува со новите тестирања. САД досега извршиле 1.054 нуклеарни проби, а последната експлозија е забележана во 1992 година во Невада.

Американски конгресмени од Невада најавија дека ќе се спротивстават на секој обид за обновување на нуклеарни тестови, оценувајќи дека вакви потези можат да ја вратат планетата чекор поблиску до нуклеарна трка.