Тони Коњановски официјално го прими Уверението за избран градоначалник на Општина Битола, со што започнува неговиот нов четиригодишен мандат. Врачувањето беше извршено од претседателот на Општинската изборна комисија, Игор Талевски.
Во обраќањето пред сограѓаните, Коњановски истакна дека зад себе остава мандат со стотици реализирани проекти кои ја подобриле инфраструктурата, културната и спортската понуда, образованието и јавните услуги во општината. „Се работеше насекаде – од центарот до најоддалечените рурални подрачја. Се изградија патишта од над 50 километри, се инвестираше во топлификација, јавни објекти, култура и спорт“, рече тој.
Коњановски потенцира дека во следните четири години ќе продолжи со реализација на започнатите проекти и со развој на нови, со цел Битола да ја врати својата препознатливост и да стане модерна, урбана и динамична општина. Тој најави изградба на нов булеварски влез, реконструкција на улици, обнова на јавни простори, како и унапредување на образованието, културата и спортот.
Градоначалникот посочи дека ќе продолжи да одговара на критиките на граѓаните и дека транспарентноста и соработката со изведувачите и јавноста остануваат приоритет. „Гласот на народот е главната моја сатисфакција и мерка за сработеното“, додаде тој.
Коњановски истакна дека ќе работи и на создавање нови работни места, привлекување инвестиции и зајакнување на локалната економија, со цел младите да останат да живеат и работат во својот град. Тој ја потврди својата посветеност Битола да биде место каде што сите жители ќе можат да живеат подобро, со достоен живот и развиена инфраструктура.
„Да ги задржиме младите, да ги привлечеме со успешни приказни, со зајакната економија, со добра инфраструктура и здрава животна средина. Да им дадеме достоен живот на сите жители на Битола“, порача Коњановски, заблагодарувајќи им се на граѓаните за довербата и поддршката.
