Европол откри повеќе од 600 руски платеници

Во рамки на втората фаза од истрагата спроведена заеднички од молдавската и украинската полиција, Европол помогна во откривањето на 654 членови на руските приватни воени компании „Вагнер“ и „Редут“ кои биле вклучени во борбени операции против Украина.

Истрагата покажува дека меѓу осомничените има државјани од Украина, Молдавија, Казахстан, Узбекистан, Таџикистан, Туркменистан, Азербејџан, Ерменија и Босна и Херцеговина. Се верува дека овие лица учествувале во сериозни воени злосторства, вклучувајќи сексуално насилство, егзекуции на воени затвореници и убивање цивили.

Во рамки на операцијата беа претресени 70 куќи во Молдавија и Украина, при што беа запленети огнено и ладно оружје, муниција, униформи, ознаки со симболите на паравоената компанија „Вагнер“, како и електронска опрема.

Европол и националните власти документирале места за регрутирање и обука, мапирале командни структури и собрани се видео и фото материјали кои укажуваат на учество на странски државјани во непријателства на територијата на Украина и Демократска Република Конго. Украинските власти претходно доставија 280 имиња на странски државјани за кои се сомнева дека учествувале во борбени операции.

Истрагата дополнително ја потврдува сложената мрежа на приватни воени компании и нивната вмешаност во сериозни кршења на меѓународното хуманитарно право.