Од 30 октомври, турските државјани повторно мораат да влегуваат во Црна Гора со визи, по серија сериозни инциденти, говор на омраза и протурска хистерија што ја зафатија улиците на Подгорица, објавува Deutsche Welle.
Сè започнало со тепачка меѓу неколку црногорски и странски државјани, при што еден млад човек од Подгорица бил повреден. Иако првично се сомневале дека виновници се Турци, полицијата уапсила тројца Азербејџанци и еден Турчин. Двајца осомничени за обид за убиство се пуштени на слобода поради недостаток на докази.
Инцидентот предизвика експлозија на незадоволство и отворена ксенофобија против Турците. Премиерот Милојко Спаиќ експресно одлучи да ги удоволи барањата на улицата и да воведе визи за турските државјани, иако мнозинството осомничени биле од Азербејџан.
Спаиќ потенцирал дека безбедносниот сектор одговорил соодветно и ги заштитил граѓаните, но не се осврнал на протести каде што групи луѓе скандирале „Убиј Турчин“ и „Турци надвор“, што е казниво според црногорскиот закон.
Во меѓувреме, осум лица се уапсени за физички напади врз странци или ширење говор на омраза преку социјални мрежи. Опозицијата ја критикува Владата, тврдејќи дека „државата паднала на испитот“.
Турците имаат значајна улога во црногорската економија: вложиле над 92 милиони евра, поседуваат 14.500 компании и сочинуваат петтина од летовите кон и од Црна Гора. Првиот ден по воведувањето визи, бројот на пристигнувања од Турција се намалил од просечни 150 на околу 40 лица.
Владата најави поостра имиграциска политика, вклучувајќи ограничувања за отворање компании и добивање дозволи за престој и работа за странци кои не ангажираат црногорски државјани.
Новите мерки следат по години на занемарување на имиграциската политика и реакција на валот ксенофобија и омраза против странците, оценува Deutsche Welle.
