Македонија

Мицкоски од Кичево: „Градот се ослободи – почнува нова ера на обединување и развој“

Претседателот на ВМРО-ДПМНЕ, Христијан Мицкоски, вечерва престојуваше во Кичево, каде му ја честита победата на новоизбраниот градоначалник Александар Јовановски над досегашниот градоначалник Фатмир Дехари.

„Кога единството е посилно од поделбите, кога желбата за правда е посилна од криминалот и кога волјата за иднина е посилна од хаосот и безредието – тогаш се испишува историја. Јасно е дека се работи за Кичево“, напиша Мицкоски на својот Фејсбук профил.

Тој им се заблагодари на кичевчани за, како што рече, „полното срце и душа“ и порача дека со новиот градоначалник Јовановски ќе следува период на реализација на бројни проекти за подобар живот и модерно Кичево.

„Вечерва ќе се радуваме едни со други и ќе си подадеме рака, а од утре ги засукуваме ракавите – не чека многу работа“, рече Мицкоски, додавајќи дека градот „денес гласал за слобода и се ослободил од човек кој се богател на грбот на граѓаните“.

Тој нагласи дека Кичево добило градоначалник кој е „родител, сопруг и доктор“, но пред сè – човек кој обединува. Мицкоски се заблагодари на сите етнички заедници кои го поддржале Јовановски и порача дека ова е „нова страница на заедништво и развој“.

„Оваа доверба е потврда за политиките на ВМРО-ДПМНЕ. Со 55 градоначалници, огромно парламентарно мнозинство и довербата на народот, заокружуваме историски циклус. Ветувам чесна, трудољубива и обединета работа за сите граѓани“, истакна Мицкоски.

Тој уште еднаш ги повика сите Македонци, Албанци, Турци, Срби, Власи и Роми да се обединат околу идејата за заедничка држава – „наша заедничка Македонија што ќе ја градиме заедно“.

Македонија

Николоски: Македонија е пример за почитување на мајчиниот јазик на турската заедница

Нема поблизок народ за македонскиот народ од турскиот, нема поблиска држава за Македонија од Туркије и горд сум што можам да кажам дека Македонија овозможува изучување на мајчиниот турски јазик на турската заедница како најголема цивилизациска придобивка, рече заменик претседателот на Владата, Александар Николоски, на одбележувањето на Денот на наставата на турски јазик.

“Има многу заднички што можеме да кажеме и заеднички да споделиме меѓу двата народи и двете држави, а секако наставата на мајчин јазик е најголемата цивилизациска придобивка која што еден народ може да ја има. Горд сум што можам да кажам дека Македонија тоа го овозможува на сите припадници на турската заедница, на турскиот народ кој што живее во Македонија и ова е нешто што треба заеднички да го градиме и надградуваме затоа што нашите јазици коегзистираат со векови и тоа е цивилизациска придобивка која мора да ја надградуваме со децениите и вековите кои што доаѓаат пред нас.

Нема поблизок народ за мекедонскиот народ од турскиот, нема поблиска држава за Македонија од Туркије и затоа треба да заеднички да создаваме уште подобри услови за изучување на турскиот јазик и наставата на мајчин турски јазик. Нека е со среќа и да е за многу години, а ние заеднички да го зајакнуваме партнерството меѓу македонскиот и турскиот народ”- се обрати заменик претседателот на Владата, Александар Николоски.

Македонија

Поради густата магла откажани сите летови од Меѓународниот аеродром Скопје

Авиосообраќајот на Меѓународниот аеродром Скопје денеска е целосно прекинат, откако поради густата магла и значително намалената видливост беа откажани сите планирани летови, соопштија надлежните служби.

Од раните утрински часови, аеродромот не реализира ниту полетувања, ниту слетувања, а сите редовни летови на повеќе авиокомпании, меѓу кои Wizz Air, Turkish Airlines и Croatia Airlines, се откажани или пренасочени кон алтернативни аеродроми во регионот.

Според информациите од управувачот на аеродромот, ТАВ Македонија, густата магла ја намали видливоста под безбедносниот минимум за нормално одвивање на авионскиот сообраќај, поради што е донесена одлука за целосен прекин на летовите сè додека не се подобрат временските услови.

Дел од авионите што требало да слетаат во Скопје биле пренасочени кон аеродромите во Охрид, Приштина, Софија, Солун и Тирана, додека патниците се известуваат да не доаѓаат на аеродромот без претходна проверка на статусот на нивниот лет.

Од ТАВ апелираат патниците редовно да ги следат официјалните соопштенија и да стапат во контакт со своите авиокомпании за дополнителни информации и евентуални промени во распоредот, бидејќи маглата и понатаму ја отежнува воздушната навигација.

Македонија

М-НАВ ја заврши целосната демонтажа на стариот радар на Аеродромот Скопје

Соопштение за јавност

М-НАВ денеска успешно ги заврши преостанатите градежни активности за целосна демонтажа на останатите делови од стариот радар на Меѓународниот Аеродром Скопје.

Работите беа реализирани во период со магла и намалена видливост, кој беше оптимално искористен за комплетно и безбедно завршување на активностите, без какво било влијание врз одвивањето на воздушниот сообраќај.

Со оваа фаза се заокружува процесот на демонтажа на стариот и неупотреблив радар, како предуслов за понатамошните активности поврзани со инсталацијата на новиот модерен радарски систем.

М-НАВ и понатаму останува целосно посветен на безбедноста и континуитетот на воздушниот сообраќај, како и на навремена и професионална реализација на сите планирани активности.