Новoизбраниот претседател на Советот на Општина Битола, Бојан Бојкоски од ВМРО-ДПМНЕ, на првата изјава по изборот порача дека во Советот нема да се дозволат лични навреди и дискредитации и дека дебатата мора да се врати на ниво кое одговара на институција што работи во интерес на граѓаните.
„Нема да толерирам лични навреди, без разлика од кого и кон кого се упатени. Советот мора да биде место за конструктивна и достоинствена дискусија, а не простор за лични пресметки,“ истакна Бојкоски.
Тој најави дека ќе се работи на унапредување на деловникот за работа на Советот за да се отстранат сите недоречености со кои се соочувале советниците во претходниот состав, додавајќи дека времето на празни критики завршило.
Бојкоски испрати и порака до градежните компании кои ги изведуваат инфраструктурните проекти во Битола.
„Почитувајте ги роковите и стандардите. Секоја импровизација и неквалитетна изведба ќе биде санкционирана. Толеранција на грешки нема да има,“ рече тој.
Ова е втор мандат на Бојкоски како советник, а за претседател на Советот беше избран со 18 гласа „за“ од советниците на ВМРО-ДПМНЕ, ЗНАМ и ДУИ.
Во новиот состав ВМРО-ДПМНЕ и Коалицијата имаат апсолутно мнозинство со 16 советници од вкупно 31. СДСМ има пет, „Поинаку“ четири, Левица два, а по еден советник имаат ЛДП, ДУИ, ЗНАМ и Грин.
Формирани се 19 комисии, од кои 17 ќе ги водат советници од владејачкото мнозинство, додека две – за безбедност и за правата на децата – ќе бидат предводени од претставници на опозицијата.
