Рускиот претседател Владимир Путин на 4 ноември потпиша закон со кој се воведува целогодишен воен рок, според порталот за руски правни акти. Овој потег претставува значителна промена во однос на досегашниот систем на регрутација, кој се засноваше на два годишни повика во армијата.
Досега младите мажи беа повикувани двапати годишно на задолжителна едногодишна воена служба, пишува Kyiv Independent.
Иако е формално забрането регрутите да бидат испраќани во странство, бројни извештаи укажуваат дека многумина се соочуваат со притисоци да потпишат договори со руското Министерство за одбрана и потоа да бидат испратени да се борат во Украина.
Новите регрути и понатаму ќе бидат повикувани за воена служба во традиционалните пролетни и есенски рокови — од 1 април до 15 јули и од 1 октомври до 31 декември — но регрутните и лекарските комисии во воените оддели сега ќе работат во текот на целата година.
Според Андреј Картаполов, претседател на парламентарниот Комитет за одбрана и автор на законот, реформата има за цел да го намали притисокот врз воените комесаријати.
Во Русија, професионалните војници се оние што потпишуваат договор со армијата и ја сочинуваат нејзината главна структура, додека мобилизираните се цивили кои се повикуваат да ги засилат трупите во воени услови.
Путинската мобилизација од 2022 година — прва во Русија по Втората светска војна — беше предизвикана од неуспесите на фронтот и доведе до масовни протести во земјата, како и бегство на повеќе од 261.000 Руси во странство.
Иако Кремљ подоцна објави дека мобилизацијата е „завршена“, ниту еден претседателски указ сè уште официјално не ја укинал.
