Свет

Русија ги нарече нуклеарните тестирања на Трамп сериозни: „Мораме да реагираме“

Русија располага со најсовремена нуклеарна тријада во светот, изјави во средата портпаролот на Кремљ, Дмитриј Песков.

Тој нагласи дека е направена огромна работа за да се обезбеди сигурноста на земјата, пренесе агенцијата ТАСС.

„Нашата нуклеарна тријада е целосно обновена. Тоа е, всушност, најсовремената нуклеарна тријада во светот. Направен е голем напор за да се гарантира нашата безбедност“, изјави Песков пред новинарите.

Претседателот на Русија, Владимир Путин, претходно денеска со постојаните членови на Советот за безбедност разговараше за тоа како Москва треба да одговори на американските нуклеарни вежби одржани во октомври.

Според министерот за одбрана Андреј Белоусов, вежбите опфатиле симулација на превентивен ракетно-нуклеарен удар врз Русија, додека САД истовремено планираат распоредување ракети во Европа и во азиско-пацифичкиот регион, кои би можеле да стигнат до централна Русија за само шест до седум минути.

Путин ги нарече изјавите на американскиот претседател Доналд Трамп за обновување на нуклеарните тестирања „сериозни“ и истакна дека Русија ќе биде принудена да реагира доколку која било држава потписничка на Договорот за севкупна забрана на нуклеарни проби го прекрши. Тој додаде дека Москва нема намера да се повлече од договорот, но ќе дејствува „соодветно“ ако другите го направат тоа.

Путин му наложи на Советот за безбедност да собере информации, да ја анализира ситуацијата и да подготви предлог за можен почеток на подготовки за руски нуклеарни тестирања.

Министерот Белоусов оцени дека Русија треба веднаш да започне подготовки за тестирања во полн обем, предупредувајќи дека САД активно го зголемуваат своето стратешко офанзивно вооружување.

Директорот на ФСБ, Александар Бортников, побара дополнително време за изработка на предлозите, посочувајќи дека ситуацијата е „многу сложена“.

Во исто време, според руските извори, Вашингтон денеска извршил пробно лансирање на неоружена интерконтинентална балистичка ракета „Минитмен III“ од базата Ванденберг во Калифорнија.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.