Коалицијата ВЛЕН оцени дека раководството на ДУИ се наоѓа во „политичка паника“ по локалните избори и дека, како што наведуваат, обидот да се претстави референдумската иницијатива како патриотска кауза не успеал кај албанските гласачи.
„Албанците не паднаа на манипулативната кампања изградена врз лаги и лажен патриотизам. Со десет освоени општини, ВЛЕН ја поништи реториката дека гласовите на Албанците се приватна сопственост на една партија“, се наведува во соопштението.
Од ВЛЕН посочуваат дека во ДУИ, наместо анализа на изборниот резултат, се трага по виновници надвор од партијата. Според нив, претставува „апсурд“ обидот Блерим Беџети да се прикаже како симбол на промени.
„ДУИ не може да се реформира затоа што никогаш не ја разбра суштината на тој збор. За нив власта не беше алатка за служба на народот, туку услов за опстанок. Сега, кога власта им се лизга од рацете, се соочуваат со сопствената криза“, додава коалицијата.
Во заклучок, ВЛЕН порача дека продолжува да работи „со довербата на граѓаните, со чисти раце и со политика насочена кон јавниот интерес, а не кон лични привилегии.“
