Преку океанот, во далечна Австралија, расте нов македонски фудбалски потенцијал – 16-годишниот Самуел Вртковски, член на Macarthur Bulls, клуб што настапува во најсилната австралиска U16 лига. Иако се развива во сосема поинакво фудбалско опкружување, неговиот најголем сон останува ист: еден ден да го облече дресот на Македонија.

Роден во 2009 година, Самуел во септември ја прослави својата 16-та година. Настапува како дефанзивен играч за врска, позиција што ја покрива со голема сигурност, зрелост и техничка прецизност.

Младиот Вртковски веќе важи за играч со исклучително чувство за игра – одличен преглед, прецизни додавања и силна тактичка поставеност за своите години.

Неговите бројки оваа сезона го потврдуваат тоа:

Точност на додавања: 91% Добиени дуели: 2.9 по натпревар Пресечени топки: 2.3 по натпревар Успешни дриблинзи: 2.7 по натпревар Асистенции: 11 во сезоната

Со висина од 175 сантиметри, Самуел е физички подготвен и доминира во дуелите, што дополнително го прави атрактивен за секоја фудбалска школа.

Голема желба и на Самуел и на неговото семејство е во иднина да заигра за Македонија. Фудбалската фаланга постојано бара млади таленти ширум светот, а Вртковски несомнено е еден од нив.

Македонската фудбалска федерација би можела да обрне внимание на неговиот развој – а ако со својот квалитет ја заслужи шансата, воопшто не е невозможно во иднина да го видиме во црвено-жолтиот дрес.

Во коментарите под објавата се наоѓа и видео со најдобрите моменти од Самуел Вртковски.

Министерството за спорт информира дека министерот за спорт, Борко Ристовски, го именува професор д-р Лука Поповски за советник во својот кабинет. Со долгогодишно искуство во образованието, спортските политики и развојот на младите, проф. д-р Поповски ќе придонесе во креирањето и спроведувањето на стратешките приоритети на Министерството.

Професор д-р Лука Поповски работи како вонреден професор на Катедрата по општествени науки ( Педагогија на ФЗО и спорт, Педагошки предизвици во образование и спортот, Олимпизам) на Факултетот за физичко образование, спорт и здравје на Универзитетот „Св.Кирил и Методиј“ во Скопје.

Во својата долгогодишна кариера во областа на спортот, проф. д-р Поповски има значајно професионално искуство стекнато во Општина Ѓорче Петров, каде што работеше како советник за спорт во Секторот за нормативни работи и Одделението за јавни дејности. Во рамки на својата функција, тој ја следеше и анализираше состојбата во областа на образованието и предлага мерки за подобрување; ги следеше законските прописи од областа на локалната самоуправа, образованието и спортот и се грижеше за нивна примена; ги следеше меѓународните искуства во областа на образованието, младите и спортот и предлага иницијативи за нивна имплементација; учествуваше во проектни тимови за реализација на проекти за образование, млади и спорт.

Дополнитело, проф.д-р Лука Поповски подготвуваше проекти од областа на спортот, предлог-одлуки, програми и други прописи, учествуваше во подготовка на програми за организирање спортски настани и иницираше нови идеи за развој и промоција на спортот. Во рамки на Одделението за работа на градоначалникот, активно учествуваше во оценка и давање мислење за спортски проекти од значење за локалната заедница.

Лука Поповски е дипломиран професор по физичко образование и дипломиран тренер по спорт на Факултетот за физичко образование и спорт на УКИМ. Во 2009 година се здобива со титулата магистер по кинезиологија на Катедрата за теоретски и методски истражувања на ФФОС со одбрана на магистерскиот труд на тема: „Валоризација на спортско-рекреативни активности на планината Водно како природен и туристички потенцијал “.

Во 2014 година напредува во доктор на науки по кинезиологија, со докторска дисертација на тема: „Влијанието на социо-демографски карактеристики врз формирањето на ставот и мотивите кон физичка активност кај учениците од 11 до 14 годишна возраст“, а во 2024 се здобива и со звање доктор на науки од полето образование педагогија со одбрана на докторскиот труд на тема: „Дидактичко-методски модели во физичкото и здравствено образование во првиот воспитно-образовен период“.

Тој е автор и на повеќе научно-истражувачки трудови од областите кинезиологија, спортско образование и педагогија.

Како советник, проф. д-р Поповски ќе биде директно вклучен во креирањето на политики, развој на програми и следење на реформските процеси во националниот спортски систем.

Со именувањето на проф. д-р Лука Поповски, Министерството за спорт добива засилување кое ќе придонесе за поефикасни политики, стратешко планирање и унапредување на спортот на национално ниво.

Фудбалската федерација на Македонија (ФФМ) изрази искрена благодарност до доскорешниот селектор Благоја Милевски и неговиот стручен штаб за досегашната работа, заложба и професионален пристап во водeњето на националниот тим.

Од федерацијата порачаа дека ја ценат посветеноста на Милевски и резултатите што репрезентацијата ги постигна под негово раководство, нагласувајќи дека соработката била на високо професионално ниво.

„Му посакуваме здравје и многу успех во понатамошната тренерска кариера“, стои во соопштението на ФФМ.