Русија е подготвена да одговори на барањата на Венецуела за воена помош, но истовремено повикува на избегнување на каква било ескалација на тензиите во регионот, изјави денес портпаролката на руското Министерство за надворешни работи, Марија Захарова.
Ова следува откако венецуелскиот претседател Николас Мадуро побара од Москва воена поддршка, вклучувајќи поправка на борбените авиони Су-30, надградба на радарските системи и испорака на ракетни системи.
Каракас го оправдува овој чекор како одговор на, како што тврдат, растечките закани од САД, кои во последните месеци значително ја зголемиле својата воена присутност во Карибите. Американската војска распоредила разурнувачи, подморници и борбени авиони Ф-35 во близина на Порторико и јужните Кариби, што ја прави регионот едно од клучните жаришта на тензиите помеѓу Вашингтон и сојузниците на Русија.
Во исто време, Венецуела ја зајакнува соработката со Москва преку нови договори за воена и енергетска соработка, а руските официјални лица редовно истакнуваат дека се подготвени „да го поддржат пријателскиот народ на Венецуела“. Овој развој дополнително ги заострува тензиите во регионот, во време кога Каракас сè почесто ја обвинува САД за „агресивна политика“ и бара поголема поддршка од своите сојузници.
