Америка на нишан – Северна Кореја со директна закана за офанзива
Севернокорејскиот министер за одбрана Но Кванг Чол остро го критикуваше пристигнувањето на американскиот носач на авиони Џорџ Вашингтон во јужнокорејското пристаниште Пусан и посетата на американски и јужнокорејски функционери на демилитаризираната зона меѓу двете Кореи. Тој предупреди дека Пјонгјанг ќе преземе „поофанзивни акции против непријателските закани“.
„Американската армија стана дрска во своите потези, намерно ескалирајќи политички и воени тензии во регионот“, изјави Но, пренесе севернокорејската агенција KCNA.
Истовремено, САД соопштија дека последното севернокорејско лансирање балистичка ракета не претставува непосредна закана за Америка или нејзините сојузници, но предупредија дека тоа го покажува „дестабилизирачкиот тренд“ на Пјонгјанг.
Ракетата паднала во близина на економската зона на Јапонија, без пријавена штета. Јапонската премиерка Санае Такаичи наложи итна реакција и заштита на населението.
