Томио Окамура, новоизбраниот претседател на долниот дом на чешкиот парламент, нареди да се симне украинското знаме од зградата на Претставничкиот дом, каде се вее од 2022 година како знак на поддршка за Украина.
Лидерот на десничарската популистичка партија СПД објави видео во кое држи скала на која човек го симнува знамето, истакнувајќи дека тоа е „одреден симбол“. „По моја наредба, украинското знаме е симнато – за само неколку секунди“, изјави Окамура за порталот iDNES.
Неговата партија во предизборната кампања ветуваше токму тоа – отстранување на украинските знамиња од државните институции и намалување на поддршката за Киев. Окамура повеќепати повикуваше на ограничување на правата на украинските бегалци и прекин на воената помош за Украина.
Неколку часа по симнувањето, опозициските партии – Граѓанска демократска партија, STAN и Пиратите – повторно поставија три украински знамиња на зградата на парламентот, истакнувајќи дека Чешка не смее да ја напушти поддршката за нападнатата земја.
Сепак, новата влада, која најверојатно ќе ја предводи поранешниот премиер Андреј Бабиш, најави можност за драстично намалување на воената помош за Украина, преминувајќи од испорака на оружје и муниција кон хуманитарна помош и дипломатски иницијативи за завршување на војната.
Филип Турек, претседател на партијата Мотористи, истакна дека Чешка ќе ги почитува обврските кон НАТО, но приоритет ќе биде „заштита на националните интереси“ и избегнување на „ескалација која би ја загрозила енергетската и економската стабилност на земјата“.
